Shillong, Ïaiong 09: Ki MLA ba mynta jong ki party bapher bapher kynthup jong ka National Peoples Party (NPP) ki la pynpaw ïa ka jingkwah ban pyniasoh noh sha ka BJP hashuwa jong ka elekshon MLA 2023.
Ka tyllong khubor ka pyntip ba kumba 4-5 ngut ki MLA ba mynta bad kumba 12-13 ngut ki MLA barim kila leit ïakren ïa ka BJP ban ai ïa ka ticket jong ka BJP kynthup kiba dei na ka NPP.
Haba kylli, u Nongïalam ka BJP Bah A.L.Hek ula kyntait ban ïathuh ïa ka kyrteng jong ki MLA ba kwah pyniasoh bad ong “Ngam pat kwah ban ïathuh ïa ka kyrteng jong ki hynrei kila don mynta hakhmat eh. Ynda la dei la por ngin sa pynbna ïa ki”.
“Hato phi pyrkhat ba baroh ki MLA kin dei ki kyrtong kiban jop biang? lada ki dang dei kiban dang jop ngin sa pdiang ïa ki hynrei lada kim dei, ka dei tang ka jingpynsyrwa kai ïa ka por. Lada ki dei ki kyrtong ki ban jop, lada ki kwah ban iasoh sha ka BJP, ka jingkhang ka plie beit ïa ki” ula ong.
U Bah Hek ula pynpaw ruh ïa ka jingsngew skhem ba ka BJP kan ïoh bun eh ka jingjop ban ïalam ïa ka Sorkar ba thymmai ha u snem 2023. Ula kam ruh ba ki paidbah ka Jylla Meghalaya kila pdiang mynta ïa ka BJP.
“Hynrei ngi dang donkam ïa ki katto katne ki nongïalam ban wan iasoh sha ka Party namar ha Meghalaya kam shong eh ha ka party hynrei ka dei ka ki nongïalam shimet” ula ong.
Une u Nongïala mka BJP ula kam “Haba ngi kren ïa ki paidbah ha ki jaka nongkyndong ki ju ong beit ba ka party u Modi ka dei kaba biang eh- mynta baroh kila pdiang ïa ka BJP namar ka party u Modi ym kum ha ki snem bala leit noh, ba ki paidbah ki artatien bad kim kwah ban ïohsngew ïa ka kyrteng jongka BJP.
“Mynta ki ong ba u Khaw la ai da ka BJP, Gas la ai da ka BJP, ka Um da ka BJP. Phi kren ïa kano kano ka skhim ruh bala pyntrei hapoh ka Jylla ka dei kaba la prat lynti da ka Myntri Rangbah Duh ka Ri” ong u Bah Hek.
