Nongstoiñ, Ïaïong, 18: Halor ka jingpynbna jong ka sorkar lyngba ki lad pathai khubor da kaba ka la kyntu ruh ba ki paidbah kin pynkhlaiñ ïa ka kam ri jingri kum ka ri syiar, sniang, dohkha bad kiwei kiwei, na ka liang ki paidbah ka West Khasi Hills, ki la khmih lynti ba katei ka jingpynbna jong ka sorkar, kan sa treikam bad kan long ka jingmyntoi kaba khraw ïa ki paidbah nongshong shnong.
Ki paidbah nongshong shnong na ki nongkyndong ki la pynpaw ba ka jingpynshlur jong ka sorkar ban ri syiar ka long beit tang na ka bynta jong kito kiba ri ïa ki syiar khlem kpa kata ïa ki syiar Kuroiler bad ki syiar Broiler, hynrei na ka bynta ki ba ri ïa ki syiar Khasi kam ju tip. Ki la ong ruh ba kumba ka long mynta kawei pa kawei ka longïing ha ki nongkyndong ki dei kiba ri ïa ki syiar Khasi bad kim kwah ban ri da ki syiar Kuroiler ne Broiler, namar ka jur palat ka jinglut ha kaba ai bam. Ki la ong ba ki don shibun ki longïing kiba la pyrshang ban ri ïa kitei ki jait syiar, hynrei kim ju lah ban pynbiang bad tang hadien katto katne por ki sangeh noh.
Kiwei pat ki la ong ba ki syiar Khasi ki ïapher bak ly bak na kitei ki Kuroiler bad Broiler, namar ïa ki syiar Khasi lada ai bam tang malu mala ha ka por mynstep ruh kim lei lei namar ki lah ban shah ïa u slap, ka jngshit bad jingkhriat bad shisien ba la shna bha ïa ka sem kim ju lei lei. Ki la ong ruh ba don teng teng ba ki ïap khlam hynrei katei ka khlam ka jia tang tengkhat eh.
Ki la ong ba ha nongkyndong ki ïing ki ïa jngai bha kawei na kawei pat kumta ka jaka ka kylluid bha bad ki syiar Khasi ki pahuh ka bam.
