Shillong, Naiwieng 14 : U Symbud Myntri Rangbah ka Jylla ba khmih ïa ka Tnad kam pohïing u Bah Prestone Tynsong mynta ka sngi Ba-ar, ula ong ba ka Sorkar ka dang ap ïa ka rai jong ka Hynniewtrep National Liberation Council (HNLC) halor ka jingkyrpad ka sorkar ba ki Nongïalam ka seng kin wan noh hi da lade sha ka jingïakren ïasuk ban wan.
Haba ïakren bad ki nongthoh khubor, u Bah Prestone ula ong “Nga ban biang sa shisien ba ka Sorkar Jylla bad ka Sorkar Pdeng ki ïeng skhem bad kwah eh ban bteng ïa ka jingïakren bad ka HNLC khnang ba ka jingshong suk shongsaiñ kan ïai neh shirta”.
“Bad ngi dang ap ïa ka jingaiktien na ki (HNLC) namar ba ki Nongïalam ba hakhlieh kim pat wan satia ban ïashim bynta ha ka jingïalang. Kumta ngi la phah leit phai ïa ki (dkhot ka HNLC) ha ryngkat ka jingkyrpad bad ka jingkyrpad jong ngi ka long ba ynda ki la long kiba la khreh ba kin sngewbha pyntip sha ngi namar kum ka Sorkar Jylla bad Sorkar Pdeng ki dang ap ban don biang ka jingïakren” ula bynrap.
U Bah Prestone ula ong “ ïa mynta hi, ka jingïakren ba pura (official) ka la long tang shisien bad phi tip ruh ba kane ka jingïakren ka dei tang bad ki nongïalam ba hap ha ka kyrdan Second Rank. Kumta ngi kyrpad ba ha ka jingïalang ba-ar ne ba lai, ki nongïalam ba hakhlieh duh ki dei ban ïadonlang bad ngin sa wad ïa ki lad ki lynti ban leh eiei halor kino kino ki kam ba la ïakren halor ka miej”.
Nalor kata ka sorkar ka kular ruh ban ai ka jingïada ba kyrpang ïa ki nongïalam ka seng HNLC lada ki kloi ban wan sha ka miej jingkren ïasuk.
