Shillong, Ïaiong 15: Ka sorkar jylla shen kan sa lum noh ïa ka jingïalang kaba la sahteng slem bha kaba ïadei bad ka jingpynkynriah noh ïa ki 342 tylli ki longiing na Them Iew Mawlong.
“Ngin sa shim ïa ka rai, wat khuslai,” ong u Symbud Myntri Rangbah ka jylla, Bah Sniawbhalang haba kren bad ki lad pathai khubor ha ka sngi Nyngkong.
Katkum ka jingïathuh jong u, shen ka sorkar kan sa shong ïa ka jingïalang bad la khmih lynti ruh ba ha ka sien shong kaban wan kan sa kham shai shuh shuh.
Dei ha ka 08tarik mynta u bnai, ka Meghalaya High Court ka la pynsangeh ïa ka jingbishar haba ïadei bad katei ka jingtyrwa ban pynkynriah noh ïa ki 342 tylli ki longiing na Them Iew Mawlong haduh ka 28tarik Ïaiong, ban ailad ïa ka sorkar jylla bad ka Harijan Panchayat Committee ban wad lad ban pynbeit.
Ka sorkar jylla dang shen ka la kyrpad ïa ka sorkar pdeng ba kan ai kumba 2.5 lane 3 akar ka jaka kaba ym pat pyndonkam jong ki shipai kaba don mar pyrshah bad ka petrol pum ha Iew Mawlong.
