Tura, Nailar 21: Ka Garoland State Movement Committee (GSMC) hapoh ka jingïalam u Co Chairman u Balkarin Ch Marak bad u Addl. General Secretary u Bostone M Sangma ki la leit ïakynduh ïa ki nongïalam ka Tripraland Statehood Demand Groups ,ha ka 18 tarik Nailar 2022 ha Agartala Smart City. Ha katei ka jingïakynduh ki la ïoh ban ïakren ïa u nongïalam ka Tripraland Statehood uba dei ruh u Chairman ka Tripura Autonomous District Council u Pradyot Bikram Manikya Debbarma namar u dei ruh u Prsident ka Tripara Indigenous Progressive Regional Alliance (TIPRA).
Ki la ïakren halor kiba bun ki mat khamtam ha kaba ïadei bad ka jingïada ïa ki trai ri riewlum rit paidbah bad kumjuh ban ïatrei lang ban dawa jylla Tripraland bad Garoland. Na ka liang u Pradyot u kular ban ïatrei lang halor kiba bun ki mat kiba ïadei bad ki riewlum ha kane ka thaiñ.
