Kut noh ka FIDE Rated Chess Tournament ha Tura

Shillong, Risaw 10 : Ka jingïalehkai chess ba nyngkong eh kaba la tip kum ka ka FIDE Rated Chess Tournament ba la ïashim bynta da ki nongïalehkai ka Meghalaya bad Arunachal Pradesh hapoh ka jingpeit jingkhmih jong ka FIDE World Chess Federation ka la poi noh sha kaba kut ha ka sngi Saitjaiñ jong ka taïew ba dang shu dep ha SMELC Building, Dakopgre, Tura.
Ïa katei ka tournament kaba la sdang ha ka 3 tarik haduh ka 8 tarik Risaw 2022 la pynïaid ïa ka da ka Garo Hills Chess Association (GHCA) ha ryngkat ka jingïasnohktilang ryngkat ka bor pynïaid District jong ka West Garo Hills, District Sports Officer, Tura bad ka Meghalaya Chess Association, Shillong.
Hadien ka jingïalehkai ba shi taïew jong ka Classical Chess ha kaba ki player ki ïoh kumba shi kynta shiteng bud pat sa ka jingïalehkai Swiss League kaba 9 sien ïalehkai. Hage Lassa Nado ka wan kyrdan ba nyngkong ha ka Open category bud pat sa u Dupit Tabu ha ka kyrdan ba ar bad Barbith Sangma ha ka kyrdan ba lai.
Ïa katei ka FIDE Rated Chess Tournament la pynïaid ïa ki jingïalehkai da u Th Biju Singh, Arun Singh, Taba Anam, Ravi Kant Tiwari Senior National Arbiter badAmar Bhandari, Senior National Arbiter.
U Dolrich B G Monin uba dei u Project Director jong ka DRDA badAdditional Deputy Commissioner, West Garo Hills haba kren kum u kongsan ha katei ka sngi u la ai khublei ïa ka association kaba la pynlong ïa katei ka tournament na bynta ki nongïalehkai chess kumjuh ruh kiba la ïashim bynta bad ïa ki kmie ki kpa kiba la ïashim bynta ha katei ka FIDE Rated Tournament. U la pyntip ruh ba ka bor district hapoh ka jingïalam u Swapnil Tembe DC ka West Garo Hills ka la shna ïa ka jaka ïalehkai Chess ha D C Park, Tura kaba dei kawei na ki jaka ïalehkai ba ïaryngkat bad kiwei ki ri jong ka pyrthei kaban ai jingmyntoi na bynta ki nongïalehkai chess jong ka jylla bad kiwei pat.
Haba phai sha ki nonngjop ha ka kyrdan jong ki U-12 (Male), u Baiyangsrang M. Sangma u jop kyrdan ba nyngkong, u Saldo Angku M Sangma ha ka kyrdan ba ar bad u Nikman G Momin ha ka kyrdan ba lai. Ha ka Under -16 (Male) ïa ka nam ba nyngkong la jop da u Anubhav Sharma, Arano Rrikrim G Momin ïa ka nam ba ar bad u Chuesa Sangma ïa ka nam ba lai.
Ha ka liang ki kynthei jong ki U-12 ïa ka nam ba nyngkong la jop da ka Cheaha Nikgame G Momin, ba ar ka Amaziah Gapesa Ch Marak bad nam ba lai ka Veronia Severa S Sangma, katba ha ka Under -16, ka Amamya Cherikra K Sangma ka la jop kyrdan ba nyngkong bad ka Joana John Marak ka la ïoh ïa ka khusnam ba kyrpang.
U Jigo Josam u la jop ïa ka khusnam Best Veteran, Salchi Sangma Best Woman player katba u Princestar Sangma ïa ka Best Unrated player. Shuh shuh, u Rijied Katrai u la ïoh ïa ka nam Best player na Khasi hills, Silseng Marak na Garo Hills, Gautom Rabha na Jaintia Hills bad Tachung Dupit na Arunachal Pradesh.
Ha katei ka sngi phainal la don lang ruh u President ka Meghalaya Chess Association, Bah K M Warjri, u Secretary ka Meghalaya Chess Association u Bah Bonney Kharbani nalor kiwei kiwei.