Nongstoiñ, Naiwieng 06 : Ha ka sien ba nyngkong eh ka West Khasi Hills District Chess Association ka la pynlong ïa ka 45th Meghalaya State A Chess Championship ha Nongstoiñ Social Service Society ha ka 4 bad 5 tarik mynta u bnai, ban jied ïa ki nongïalehkai ban leit ïa shim bynta ha ka National Senior Chess Championship ka ban long ha Delhi naduh ka 28 tarik Nohprah haduh ka 6 tarik Kyllalyngkot 2023.
Lah ban pynkynmaw ba la la plie ïa kane ka program da u MLA ka Nongstoiñ bah Macmillan Byrsat ha ka sngi thohdieng jong ka taiew ha NSSS, kaba dei ka program la pynlong da ka Swiss System kaba 6 round ïa baroh ki nongïalehkai.
Ha ka sngi saitjaiñ kaba dei ka sngi pynkut, ki nongjop 4 ngut ba hakhmat eh ha ka Senior open category lyngba ka Meghalaya Chess Association ki ban leit sha Delhi ki long u Barbith Sangma, Balseng N Marak, Silkam Sangma bad u Tartush R Marak.
Ha ka kyrdan ki khynnah Skul, ki nongjop ha ka Under 10 Boys ki long u Advitiya A G, Under 15 Boys Arono Ch Momin, Under 15 Girls Amamya K Sangma. Ha ka kyrdan jong ki nongïalehkai jong ka West Khasi Hills, ki nongjop ki long Under 15 Boys Samboklang Marweiñ, Under 18 Girls Angelgrace L Marshillong, Under-18 Boys Samborlam Jyrwa, 1st Position Female Open Gavy Jones L Marshillong, Best Male Player Ronal Wanbor Lyngkhoi bad Best Female Player Daphiniewkor Wahlang.
U Deputy Commissioner ka West Khasi Hills District u bah Garod LSN Dykes IAS, la don ryngkat kum u Kongsan bad hadien ba u la ai ïa ki kyntien kyrkhu kyrdoh, u la shim ruh ïa ka bynta ban sam ïa ki khusnam sha ki nongjop, ha ka jingïadon lang u GB Gunanka IFS, President ka KCA Bah KM Warjri, bah Bonney Kharbani Secretary ka MCA, Bah Richard Sun President, ki dkhot ka WKHDCA lem bad ki nongkitkam jong ki District bapher bapher.
