London, Naitung 05: U Rishi Sunak, uba don ka jinghiar pateng na ri India ban long u Myntri Rangbah Duh jong ka ri Bilat, u la kut noh ka jinglong Myntri Rangbah mynta ka sngi hadien ka jingshah rem kput ka Party jong u, ka Conservative Party ha ka General Election kaba la long hynnin ka sngi.
Ha ka jingïajied ïa ki 650 ngut ki nongmihkhmat sha British Parliament ka Labour Party hapoh ka jingïalam jong u Keir Starmer, ka la jop haduh palat 400 Seat katba ka Conservative Party pat ka la jop tang 100 tam.
U Keir Starmer uba la don 61 snem ka rta, un long u Myntri Rangbah Duh ba thymmai jong ka ri Bilat, kaba long kawei na ki khyndiat tylli ki ri ha ka pyrthei kiab dang bat ïa ka jingsynshar Syiem.
U Sunak, 44 snem ka rta, u la long u Myntri Rangbah uba khynnah tam jong ka ri Bilat bad uba nykong eh napdeng kibym dei ki dohlieh. U la shimti ïa ka kam Myntri Rangbah jong ka Bilat ha u bnai Risaw jong ka snem 2022.
Kane ka jingjop jong ka Labour Party ka long hadien kumba 15 snem ba la synshar da ka Comservative Party.
Ki khubor na London ki ong ba u Starmer, uba la shah pynkup da ka burom Knighthood ne u Riewshlur ha ka Syiem Bilat ha u snem 2015, u la jop ïa kane ka elekshon da ka jingkyrshanh ba radbah ki nong India kiba la shong la sah ha Bilat, hadien ba u Starmer, u la wanrah ka jingkylla ha ka jingtreikam ka Labour Party ha kaba iadei ba ka Kashmir, da kaba u la ong ka Labour Party ka peit ba ka jingeh jong ka Kashmir kadei ka kam pohïing jong ka India bad Pakistan bad kan shong ha kine ki artylli ki ri ban ïapynbeit ïa ka jingeh.
