Kut ka jingïasoi soskular ka RBDSA ïa ka madan Kurkalang, shimti biang ka Dorbar Shnong Lumdaitkhla

Nongpoh, Risaw 29 : Ka Dorbar Shnong Lumdaitkhla Bhoirymbong mynta ka sngi ka la pynbna ba ka jingïateh soskular kaba la ïadei bad ka Madan Kurkalang kaba la shim wai da ka Ribhoi District Sports Association (RBDSA) la 13 snem naduh ka 27 tarik u bnai Jylliew 2011, la pynkut noh mynta ka sngi ka 29 tarik u bnai Risaw 2024, bad kane ka madan ka la kylla trai biang sha ka shnong Lumdaitkhla Bhoirymbong.
Ïa kane ka rai ban pynkut ïaka soskular hapdeng ka RBDSA bad ka shnong, la pynlong ha iing Dorbar ka shnong Lumdaitkhla, ha kaba la sakhi da ka jingdon ki nongïalam shnong ba kynthup ïa u Rangbah Shnong u Bah S.T. Rympei, u Secretary u Bah R. Rymbai, u Chairman u Bah S. Lamare, ryngkat ki dkhot ka EC jong ka shnong. Na ka liang ka RBDSA pat, la wan mihkhmat da u President u Bah R.B. Shadap bad u Secretary u Bah D. Ryntathiang.
Ka Madan Kurkalang ka dei ka madan ba heh tam ha ka thain Ribhoi bad ka dei ruh kaba la ju pyndonkam ha ki jingïalehkai bol bad kiwei pat ki tamasa ba heh, kaba la ai jingmyntoi ha ki liang bapher bapher ha ki snem ba la leit. Naduh mynta ka sngi, kane ka madan ka la long trai bad la peit la khmih biang da ka Dorbar Shnong Lumdaitkhla Bhoirymbong.