Kut jingmut ka Sorkar ban pynheh ïa ka kad liengsuiñ ha Umroi, pyntip u Conrad ha Dorbar Mang Tyngka

Shillong, Lber 07: U Myntri Rangbah ka Jylla Conrad K Sangma ha ka sngi Thohdieng ula ong ba ka Sorkar ka la kut jingmut hok ban pynheh ïa ka Umroi Airport bad ban pynher ïa ka liengsuiñ ba 19-20 seat na Baljek Airport.
“Nga phah ïa ka khubor kaba shai ba ngi la kut jingmut ban pynkhlaiñ ïa ki lad pynïasoh na suiñ, da kaba pynthikna ha ka ban pynheh ïa ka Umroi Airport ban hiar ki liengsuiñ heh bad ban sdang ïa ka jingpynher liengsuiñ na Baljek Airport,” ong u Conrad ha ka kynta kylli jingkylli hapoh ïingdorbar.
“Ki jingïakren ki la jan poi haduh ka kyrdan ba khatduh bad hapoh u 2026 ngi kyrmen ba ngi dei ban leh ban pynher ïa ki liengsuiñ na Baljek Airport,” ula pynbna bad bynrap, “Ngi la don mynta ha kata ka lynti ïaid kaba la sdang ïa ka kam”.
Ha kaba ïadei bad kane u MLA ka TMC na Nongthymmai Bah Charles Pyngrope u kwah ban tip la ka Sorkar kan pyrkhat lem ha ka ban shong bishar ïa ka jinglah ban pynheh ïa ka runway jong ka Baljek Airport ban lah hiar ki liengsuiñ kiba heh khnang ban lah kiar na kaei kaba jia ha Umroi Airport.
Ïa kane, u Conrad ula ong ba u buddien hi shimet ïa kane ka kam ha ka kyrdan jong u. “Hynrei, ka jingkylli halor ka jingmut bad jinglah ka la wan bad ka Airport Authority of India (AAI) kam shym la pyni satia ïa ka jingkwah ïa kane ka jingtyrwa, kumta, ngi la poi ha u pud ba to ngin sdang shuwa da ka liengsuiñ ba 19-20 seat hynrei ngi dang don beit ïa kane ka jingthmu.
Shuwa kane haba jubab ïa ka jingkylli ba wanrah da u MLA ka TMC R Marak, ula pynpaw ïa ka jingsngewkhia halor ka jingpynslem ban pyntreikam ïa ka Baljek Airport wat hadien 17 sem, u Symbud Myntri Rangbah ba khmih ïa ka tnad Transport Bah Sniawbhalang Dhar ula ong, “Ka Baljek Airport ïa mynta kam pat treikam satia. Ka Sorkar ka dang ïakren bad ka AAI ban pyntreikam noh ïa kane ka Kad liengsuiñ da ki liengsuiñ ba 19-20 seat”.
Ula pyntip ba ka jaka ba heh 211.13 acre ka la don na ka bynta ban pynheh ïa ka Airport. 153.13 acre la dep ban thied hapdeng u snem 1986-1989. La pynlut ruh haduh T. 3,57,97,775 ban thied jaka haduh mynta na ka bynta ban pyntrei ïa ki jingdonkam baroh ha kane ka Airport.
Ha kajuh ka por, u bah Sniawbhalang ula pyntip ba ka Sorkar ka la pdiang ïa ka jingtyrwa ban thied shuh shuh ïa ka jaka ba 68 acre. “Ngi dang ap ïa ka jingïajurip lang bad ka AAI hashuwa ban thied ïa kane ka jaka naba 211 acre ka jaka ka dang duna bha,” ula ong.
Katkum ka jingong jong u, ka rai ban thied shuh shuh ïa ka jaka ka la mih hadien ba ka AAI ka la pynpaw ïa ka jingbym mynjur ban pynher ïa ki liengsuiñ ba rit na kane ka kad.