Shillong, Naiwieng, 25: Ki Ophisar jong ka ophis Commissioner of Customs (Preventive), Shillong kaba hap hapoh ka jingpeit jingkhmih jong ka Ministry of Finance, Sorkar India kiba la ïoh jingtip kaba bniah na ki tnat syntiat ba don kawei ka kali kaba wan na Silchar, ha ka jingpynapshrip ki la ïohbat ïa kawei ka kali Tata Punch ha ka jammiet sngi Balang ha Nongmensong, Shillong.
Ha ka jingtohkit ïa kiba shong hapoh kane ka kali, ki la len ba kim shym la kit eiei ïa kino kino ki mar kiba long be-aiñ.
Hynrei hadien ba la talasi ïa ka kali baroh kawei, la lap haduh 30 tylli ki synduk thep sabon na ki bynta ba shapoh jong ka kali. Ynda la leh test, la pynshisha ba u powder uba la ïoh kurup 370 gram u dei u Heroin.
Marmar la kurup noh ïa une u drok uba shongdor kumba 2.59 klur antad.
Arngut ki briew ki la shah kem halor kane ka jingïoh kurup ïa u drok bad ka jingtohkit ka dang ïaid shakhmat.
Ka tnat Custom ka la buh hakhmat ïa ka thok ban ïakhun ïa ki kam runar ruser kum ka jingkhaïi tuh ïa ka ksiar, sikret, u drok, ïa ki dkhotmet jong ki mrad khlaw, ïa ki pisa thok, ïa ki tiar thok. Ka tnat Customs ka ju ïatreilang ryngkat bad kiba bun ki tnat treikam kiba peit ïa ka aiñ ban tem ïa kine ki kam runar.
Kino kino ki lah ban ai jingkyrshan ïa ka jingïakhun pyrshah ïa ki kam khaïi tuh ha khappud da kaba ai jingtip sha ka tnat Customs. Ïa ki kyrteng jong ki nongai jingtip yn buh rieh noh, bad kan don ruh ka jingai khusnam, kaba lait na ka jingsiew khajna.
