Shillong, Lber 03: Ki shipai Border Security Force (BSF), ba la buh ban pahara ha khappud Indo-Bangladesh ha Meghalaya, ki la lah ban ai ka jingïada ïa u pud u sam jong ka ri bad kumjuh ruh ban lah ban tehlakam ïa ki kam beain ha ki jaka khappud.
Ha kine ki sngi na ka liang jong ki shipai BSF ki la ïoh ban kurup haduh T. 2, 13, 40,666 ki tiar beaiñ bad ki la kem ruh ïa 2 ngut ki nong India bad 9 ngut ki nong Bangladeshi kiba la donkti ha ki kam runar ha kine ki jaka khappud.
Shuh shuh na ka liang ki BSF Meghalaya ki la ïoh ruh ban kurup haduh 143 tylli ki masi bad ïoh ruh ban kurup bun bah ki jingdih pynbuaid kiba kynthup ïa u drok ba la shong dor da ki klur tyngka.
La ong ba kine ki jingpyrshang ki dei kiba la leh hapoh ka jingïatreilang bad ka jylla bad kumjuh ruh ki bor syntiat jong ka sorkar pdeng da ka jingthmu ban pynneh pynsah ïa ka shongsuk shongsaiñ ha kane ka thaiñ khappud da kaba khmih lynti ruh ban rat diengkhong ïa ki kam beaiñ.
Na ka liang ki BSF ki la ju pynlong ruh ïa ki kam ban tei ïa ka imlang sahlang bad ka bha ka miat jong ki nongshong shnong kiba sah ha ki thaiñ khappud.
Ki la don ruh ki prokram kum ka blood donation camp bad ka Civic Action Program ba kynthup ïa ka free medical camp, skill development training, sports tournament, bad ki prokram kolshor.
Na ka liang ki BSF ki la ju pynlong ruh ki jingïakren ban pynbeit ïa ki kam rung tuh ha ki thaiñ khappud bad ki border guarding force jong ka Bangladesh ha kaba kine ki la wanrah ïa ka jingïatreilang hapdeng kine ki artylli ki ri.
