Shillong, Nohprah 16: Ha ka sngi nyngkong hadien ka jingpeitngor ki shipai Border Security Force (BSF) Meghalaya Frontier ki la ïoh ban pynlulom noh ïa kiba bun ki jingpyrshang ha kaba ïadei bad ka jingthmu ban khaïi beaiñ bad ïa kane ki la leh ha ka jingpynlong ka jingkhynra kaba kyrpang ha kiba bun ki jaka khamtam ha ki khappud hapdeng ka ri India bad Bangladesh kum shi bynta ruh ban pynsngewthuh ïa ki paidbah kiba sah ha ki thaiñ khappud.
Halor ka nongrim jong ka jingïoh jingtip lyngba ki lad syntiat kiba biang, ki shipai BSF ki la pynlong ïa kiba bun ki jingleit khynra ha ki jaka kiba hab hapoh ka East Khasi Hills bad South West Khasi Hills districts.
Ha kine ki jingleit khynra ki shipai ki la ïoh ban pynsangeh bad kumjuh ruh ban kurup ïa kiba bun ki tiar ba la thmu ban khaïi beaiñ ba kynthup ïa ki thuk thuk, ka shini, ki jingri, ka kyiad, ki syiar, ki sohniamtra, ki jaiñ, ki blanket, u sying, bad kiwei kiwei pat.
Halor kane, na ka liang ki nongkhaïi beaiñ ki la iehnoh ïa kitei ki tiar ha ka khlaw kaba don hajan ka khappud bad ki la phet krad na ka daw ka jingtieng ba ïoh ki shah kem bad shah bat.
Ïa kitei ki tiar ba la ïoh kurup la aiti noh sha ka tnat ba dei khmih bad kumjuh ruh sha ki Police Station ba kin nang pynlong shuh shuh ïa ki jingtohkit bad ban leh ïa ka kam kaba donkam. Kine ki jingkhynra la ong ba ka dei na ki kam jong ki BSF ban ïada ïa ki jaka ha khappud bad kumjuh ruh ban ïakhun pyrshah ïa ki kam khaïi beaiñ kiba la treikam bha ha kine ki sngi.
