Kumno lah ban ai ‘Work Order’ sha ka Committee jong u MDC ba la rem, kylli ki MDC thymmai

Jowai, Naitung 03: Ki MDC na ka liang pyrshah hapoh ka Jaiñtia Hills Autonomous District Council (JHADC) mynta ka sngi Palei jong ka 3 tarik u Naitung kila pynpaw ka jingpyrshah jur halor ka jingai jingtrei (work order) sha ki Development Committee jong ki MDC barim wat hadien bala don mynta da ki MDC kiba shah jied thymmai.
Katkum ka shithi bala aiti mynta ka sngi ha u EM ba dei peit ia ka Civil Work Department u ma Lasky Rymbai uba dei ruh u Deputy CEM ka JHADC, ia kaba la soi da ki MDC ba kynthup ia ka kong Deivipaia Tongper, kong Laiawanlamjinghun Khynriam, ma Rikut Parien, ma Daeimi Liam, ma Nehemaia Lamare bad u ma Jamshaphrang Pohtam.
Kine ki MDC kila pynpaw ka jingpyrshah jur ïa kane ka rukom treikam jong ka JHADC kaba la aiti ban pyntrei (Work order ) ïa ki skim ka Council sha ka Committee jong u MDC barim uba la shah rem mynta ka kynti.
Shuh shuh kine ki MDC kila ïoh jingtip bala dep ban pynmih bun tylli ki work order sha ki Development Committee kaba dei jong ki MDC barim (Ex-MDC) wat lada don ïa u MDC uba la jied thymmai da ki paidbah mynta u snem 2025.
Halor kane la buh jingkylli ‘Ka kyndon aiñ aiu lane ka hukum aiu kaba la pynkup bor ïa ka Development Committee jong u MDC barim ban shim bad pyntrei ïa kine ki skhim sorkarï La kylli ruh kane ka kam kam dei mo ka jingpynhiar dor ïa ka bor treikam jong u MDC uba shong haka jaka mynta bad ka lah ruh ban pynhiar dor ïa ka hok synshar paidbahï La buh jingkylli kitei ki MDC.
La kylli ruh la don mo ka jingpynbna paidbah kaba ai bor shuh shuh ïa ka committee jong u MDC barim hadien ba um long shuh u MDC jong kata ka Constituency.
Da kaba kdew shai katkum ka Para 2 (7) jong ka Sixth Schedule, u MDC un treikam katkum ka por kaba la buh da ka aiñ, lait noh lada shah weng ne shah pynbeit hapoh ki kyndon ba la buh bad um lah shuh ban shim bynta haka synshar ne ka Development bad ka Committee kaba ïadei bad u ruh ka kut noh ka bor treikam.
Naka liang kitei ki MDC kila dawa na ka EC ba kan ai jingpynshai lyngba ka jingthoh halor kane ka kam.
U ma Daeimi Liam (MDC) ha ka jingkren sha ki lad pathai khubor ula ong hadien ka jingbuddien la lap ba ka Department ka ïaidlait ïa ki MDC thymmai ban pyntrei ïa kitei ki Work Order khlem da pyntip sha ki da kaba aiti beit sha ki MDC barim.
Haba ula kylli na u EM halor kane, la ïoh jubab pynban ïa kane lah ban treikam lang da ka jingïasngewthuh jingmut da baroh ar ngut ki MDC barim bad ba thymmai, kumta ula buh jingkylli kumno kane ka lah ban long ong u ma Liam.
Ka kong Deivipaia Tongper kala ong kum ki MDC kiba dang shu jop ‘Ngi la tip ba kala don kane ka skim, hynrei kumno la pyntreikam da ki MDC ba rim bad kane ka jingleh ki khlem burom shuh ïa ki kum ki MDC kiba dang jop thymmai’.
U ma Rikut Parien ula ong ngi khlem pyrshah ïaka skim, hynrei ula buh jingkylli kumno ka Committee barim ka dang lah ban treikam nalor ba u MDC barim uba kut noh ka por treikam. Ha ka jingpan jingshai jong u na u EM la ïoh jubab ba kane ka dei ka skim jong ka Central Skim, da kaba pyntip bala dep issue ïa ka Preliminary order hashwa ka Election, halor kane u ma Rikut u kwah ban ïoh jingpynshai kaba kyrpang na ka EC.
Katba u ma Jamshaphrang Pohtam ula ong katba lah ïa ki skim jong ka Council kiba dei ban pyntreikam ha ki Constituency dei ban pynïaid beit da u MDC uba la long mynta, hynrei kumno yn peit da ka Committee jong u MDC barim, da kaba u ong don jingmut aiu ban jied thymmai ïa u MDC bad kane ka dei ka jingbym burom shuh jong ka Council ia ki nongmihkhmat paidbah.
‘Ngim kwah ban kane kan kylla long President namar ha kawei ka sngi kan sa ktah lang ïa baroh’. Ula ong katkum ka aiñ dei beit ban aiti ha ka jingpynïaid jong u MDC ba thymmai ban lait na kano kano ka jingbakla ha ka rukom treikam.