L ehse ym pat ju don Elekshon kum u snem 2023 ba ki paidbah kin sakhi ïa ka jingkyntiap seng jong ki MLA sha kiwei pat ki party.
Haba bishar bha ïa ka jingïakyntiap seng, kiba bun ba lang hi ki sngewthuh tang kawei ka jingshisha bad kata ka long ka jingkhwan myntoi bad ka jingbieit spah. Kiba phet seng ki phet ym namar ba ka seng ba ki rung thymmai ka kham trei kham bha ban ïa ka seng ba k ila don lypa, em, kam dei kata namar ym pat don seng kaba la pyni ba ka trei shisha na ka bynta u paidbah, ym pat don seng ka ban ai jingkyrmen ïa u rit u ria u sem shilliang u kup shilliang ba kan trei na ka bynta ka bha ka miat jong ki, ym pat don seng kaba la pyni shisha ba ka trei na ka bynta u paidbah. Baroh ki ai kawei ka jubab ba ngim don ha ka bor. Ki Seng ba ïa synrop pynlong sorkar ruh ki ong ba kim don ha ka bor.
Tang shu kut ka elekshon 2023 kiba ryngkang nyngkong eh ki dei ki arngut ki MLA ka PDF sha ka NPP, u Bah Banteidor Lyngdoh na Mawkynrew Constituency bad u Bah Gavin Mylliem na Sohra Constituency. Kine ki arngut ki pynduh pyndam syndon ïa ka party PDF namarba ki khmihlynti ba kin ïoh long Myntri ynda la leit pynïasoh sha ka NPP kaba la jop haduh 26 ngut ki MLA bad ïalam biang ïa ka Sorkar MDA-II ha ka sien kaba ar ha Meghalaya.
Ryngkang sa ki lai ngut ki MLA ka Congress sha ka NPP, kiew ka jingbunpaid ka NPP haduh 31 ngut ki MLA bad kynjoh syndon ïa u Magic Number. Kine ki lai ngut ki pyrkhat ba lehse u Conrad Sangma un ai shuki Myntri kawei na West Khasi Hills bad kawei na Ribhoi hynrei haduh mynta jar jar. Kine ki lai ngut ki shu shah thung tang kum ki Adviser jong ki tnat treikam bapher bapher da kaba ïoh ruh ïa ka kyrdan ‘A’ Category.
Haba bishar ïa ka jingphet seng ka pyni ruh ïa ka jingbymdon ka jinglong tynrai ha ka seng ba ki MLA ki don. Kat haba ki don ki shu per ha sla, ki noh kat shaba beh ka lyer, na lade ym don jingskhem eiei ruh em, ym don jinglong trai eiei ruh, ym sngewthuh ïa la ka dor, ïa la ka iktiar bad ïa ka dor bad ka iktiar jong ki seng ba ki don ruh. Ki tang shu mih ani ba ki beiñ ba ki khoh, ba ki kdew ïa ki jingduna jong kato ka seng kaba la kdup la ri ïa baroh shi katto. Ki pynksan da ki nia lada theh um ha ka kriah kam pei shuh.
Hato kito ki nongmihkhmat ki bym ju trei eiei na ka bynta ka bha ka miat jong ka Constituency phi tharai ynda ki la kyntiap seng kin sa nang ban trei, kin sa lah ban plie ïa ki khmat ban ïohi bad ïa ki shkor ban ïohsngew ïa ki jingdonkam ka Constituency jong ki? Lah ban long kumta? Ki paidbah nongjied kin sa jubab hi tang shu kut ki san lyiur ba la poi ka samoi jied syiem thymmai.
Kum ki Nongjied, haduh katno ki lah ban shaniah ha kita kiba ym don thied ne don tynrai, ban shu ïa kyrshan shi kyrshan ïa kita ki phet wir seng? Ki phetwir te ki sah hi ki phet wir keiñ, shano kin ïalam ïa ka jylla haba ïalade kim tip hangno ki don?
Mynta ka shong sa ha ka bor jong u paidbah, ka Sorkar kaba kumno kin sei, ka shong ha ka jingstad jong ki nongthep vote. Ban jied ïa kijuh shi kijuh kiba khlem ai jinghun eiei ha ki snem ba la leit, ne kin ailad noh ïa kiwei de ba kin ïa pyni ïa ki jingtbit ne jingbymtbit jong ki. Lada la 50 snem ym don jingkylla kaba ai jinghun mynsiem, hato yn jia aiu lada ailad ïa kiba thymmai ba kin trei san snem, lada ym hun, yn kyntait noh ïa ki ha u 2028 bad ailad sa da kiwei pat. Lada ki paidbah ki leh kumta, ki nongmihkhmat kin hap ban trei shitom namar kin sngewthuh lada ym lah pyni bad pynmih soh kin sa shah kyntait noh. Ki nongkyntiap seng kiba ju mlien ban ryngkang dieng kper manla ka samoi kin pei skhor. Ki Nongmihkhmat kin hap ban long ki ba don ka jingkitkhlieh bad kiba lah ban ai jingkheiñ ïa ka kam kaba ki kit bad kaba ki smai ban trei hok bad ban trei khuid trei suba. Kum ka jaid bynriew hato ngi lah neem ban pyrkhat kumta?
Ki nongjied ki dei ban long kiba shemphang, kiba tip bad sngewthuh ïa la ka hok kum ki nongshong shnong ha ka Jylla bad ha ka Ri hynrei ym ban ïakmen ïa ka shi hajar ne ka ar hajar, ne khatsan bad arphew hajar ruh.
