Kumba leh ka BJP ïa ka AAP, don ka jingpyrshang ban phiah ïa ka VPP, kynnoh u Bah Ardent

Shillong, Rymphang 09: U President jong ka Voice of the People’s Party (VPP) u Bah Ardent Basaïawmoit u la kynnoh ba ka la don ka jingpyrshang ban phiah ïa ka party.
“Kumba long ka BJP ba ka la leh ha Delhi ban phiah ne pynpra ïa ka Aam Aadmi Party (AAP), ngam don jingartatien ba ka don ruh kumjuh ka jingpyrshang ban phiah bad pynpra ïa ka VPP ha Meghalaya,” ong u Bah Basaïawmoit ha ka jingïalang ïalap elekshon MDC.
U la ong ba ka party kan ym lah ban kynjuh ïa ki jingthmu bad ki thong ban wanrah jingkylla lada ki paidbah ki la shah pynbeij ha kum kine ki jingpyrshang.
Haba ong ba ka party ka mad ïa shibun ka jingïaleh bad ïakhun, u Bah Basaïawmoit u la ong, “Ka party jong ngi ka dang don tang 3 snem hynrei ki la don shibun ki jingshah kynnoh pyrshah ïa ngi.”
“Namar kata na ka bynta kito kiba dang artatien ïa ngi, nga ong ba ym dei ban kyntait ïa ngi khlem da ailad lem ïa ka VPP,” u la bynrap.