Ha kine ki sngi, ka sorkar India, ka la bthah ïa ki sorkar jylla, ba ki paidbah kiba ïadei kam bad ka sorkar, ba kin pynïasoh lut ïa ki kyrteng jong ki bad u Aadhaar number bad kitei ki kynthup ïa kito kiba ïoh jingïarap na ka sorkar, kum ki skhim baduk, ki skhim shna ïing, ki skhim nongrep bad kiwei kiwei bad nangta sa kito kiba treikam bad ka sorkar, lada dei kiba trei kontrak, kiba shim ram na ki Bank bad kiwei kiwei.
Ka jingkylli, kaba mih hangne, ka long pat, ba kumno ka sorkar kan leh ïa kito ki bym kwah ban shon aadhar ïalade? Ki don bun ki longïing, kiba la dep rai lypa, ba kin duh noh ïa u khaw reshon, tang namar ba kim don Aadhaar, nangta ïa ki longïing, ki bym kwah ban shim ïa ka health Card lane ka Meghalaya Health Insurance Scheme (MHIS), namar ba kim don Aadhaar bad kumba ka paw, la ïohi, ba baroh ki jait skhim, kin pynïasoh bad u Aadhaar bad tang kiba don Aadhaar card, kin ïoh ïa ki jingmyntoi bapher.
Mynta ka la ïaid sa ka jingpynïasnoh ïa u Aadhaar bad ki dur thep vote bad kumta kito ki bym don Aadhaar, kin nym ïoh shuh ban thep vote bad haba ka long kumta, kaei kaba ka sorkar India, kan leh ïa kito ki bym pynïasoh ïa u Aadhaar bad ki dur vote bad khlem pep, kitei kin nym ïoh satia ban leit thep vote bad nangta ka wan sa kawei pat ka mat bad kata ka long, ba kito ki bym don Aadhaar, hynrei lada kim leit thep vote, kumta kaei ka kyndon, kaba ka sorkar India kan pynngat ïa kiba kum kitei, kum ïa kine ki 30 percent, ki bym shym la shim bynta ha ka elekshon MDC, kaba dang shu dep.
Ka Constitution jong ka ri India, ka la buh lypa ïa ki kyndon kiba shai bha, ba ka hok ban im bad ban ïoh ïa ka bam, ka dei ka hok ba pura lane ka fundamental right, hynrei kumba ka long mynta, ka pyni pynban, kumba ka riti synshar jong ka ri India, kam larkam shuh, namar ba la pynïaid tang da uwei u tiar bad uta u dei u Aadhaar number.
Kaba lyngngoh ka long shuh shuh ba ka sorkar jylla, kaba dei ban ïada ïa ka hok jong ki nongshong shnong jong ka, hynrei, ka ïai pyndem toiñ ïalade, ha ka hukum jong ka sorkar India, da kaba pynbor ïa ki paidbah, kiba ïadei kam bad ka sorkar, ba ki dei ban don ïa u Aadhaar number bad katei ka long pyrshah ruh ïa ka rai jong ka Supreme Court, kaba la ju shim bishar bunsien, halor kane ka mat bad kaba ju kren shai, ba ka rai ban don ïa u Aadhaar number, ka shong ha ka jingmynjur jong u briew shimet bad ba kam dei ruh ban pynïasnoh bad ki skhim, kiba ïadei bad ki kam ai jingïarap jong ka sorkar sha ki paidbah.
Mynta ka sorkar India, ka la nang ïaid shakhmat, ban pynkhlaiñ bor ïa u Aadhaar number bad kumta ki dak ki shin, ki pyni, ba ha ki sngi, ki ban sa wan, kiba ïoh thep vote, kin dei kiba don Aadhaar number, kiba ïoh skhim shna ïing, kin dei kiba don Aadhaar number, kiba ïoh jingïarap haba khyllung bad wat ki ban ïoh khaw reshon ruh, kin dei beit tang kito kiba don ïa u Aadhaar number.
La ïohi ba ha kine ki sngi kiba bun ki dukan sam khaw rashon ki la dap da ki briew kiba ïeng laiñ ban ai ïa ki Aadhaar card number ba la Xerox ha kiba sam khaw kumba la bthah da ka sorkar.
Ka sorkar Pdeng lyngba ka sorkar jylla ka la nang pynsohsat ïa ki paidbah khamtam eh kiba shah ktah na kane dei ki longïing kiba tlot ka ïoh ka kot kiba shaniah tylli ha u khaw rashon na ka bynta ban ïoh ka bam ban pynkdang ïa ka kpoh hynrei ha kajuh pat ka por ki sorkar kiba wan ba mih bad kiba leit dei pat ki longïing kiba suk kiba pynjop ïa ki party bapher bapher hynrei ynda ki la don ha ka bor pat ki ñion kput kylla ïa kum kine ki longïing kiba ju shah pynbeij har rukom ha ki por elekshon, kumta haba wan kum kine ki jingeh kidei ban ïai kynmaw ym pat ban shongshit elekshon.
Kumba ka long mynta kiba bun ki longïing ki mad ki jingeh ha kaba ïadei bad kane ka kam. Ngim tip shuh sa kiei pat ki kam nangne shakhmat kiba ka sorkar pdeng kan dang pynmih nangne shakhmat ki ban wanrah ka jingeh ïa ki paidbah kiba la jied ïa ki.
Ki paidbah kin hap ban husiar bha nangne shakhmat naba ym lah ban tip sa kaei pat kaba ki hap ban mad nangne shakhmat bad kumba ka long mynta la synshar da u Aadhaar ha baroh ki liang bad khlem une u jait jingthaw baroh ki kam kin ym urlong satia bad bun na ki nongshong shnong ka ri India kin mad ki jingeh kiba kham khraw nangne shakhmat bad to ngin sa ïapeit sa kiei pat kiba ka sorkar pdeng kan dang pynmih ki jingkyntu ïa ki paidbah ba kin leh.
