Shillong, Jylliew 24 : U Myntri ka tnad PHE ka sorkar jylla, u Marcuise N Marak u la pyntip ba ka jingpyntrei ïa ka skim pynpoi umbam umdih haman la ki tyngkong ïing ka la kot mynta sha ka 80 persen.
Haba kren bad ki lad pathai khubor u Myntri u la pynshai ruh ba kam don satia ka jingdkoh ne ka jingthut ha ka jingpyntreikam ïa katei ka skim kumba la kynnoh.
Katkum ka jingong jong u, ka jingpyntrei mynta ïa ka JJM ha rilum Garo ka dang ïaid shaid shaid mynta bad na ka liang ka tnad ruh haba don kino kino ki jingujor na ki paidbah ki ophisar ka tnad mardor ki leit ban peit.
“Shen ngan sa leit ban jurip ïa ka jingpyntrei ïa kane ka skim kylleng ka jylla,”ong u Myntri da kaba bynrap ba kum ka tnad kin leit ruh ban peit sha kito ki jaka ba don ka jingujor ha ka rukom pyntrei.
“Dang shen ngi la ïoh ïa ka jingujor na kawei ka shnong ha rilum Garo bad mardor nga la phah ïa ki ophisar ban leit peit,” u la ong.
