Sri Nagar, Risaw 12 : Ki la don palat 70 persen na ki 90 ngut ki MLA ba jied da u paidbah ha Iing Dorbar Thawain jong ka Jammu & Kashmir kiba la pynbna paidbah ba ka kyrdan jong ki ka long palat ïa ka graduate kynthup ïa ki lai ngut kiwei pat kiba la dep ïa ka Doctorate.
Katkum ki jingkheiñ ba la lum da kawei ka kynhun treimon sngewbha ka Association for Democratic Reforms (ADR), baroh kitei ki Doctorate Degree kiba la jop ha kane ka elekshon MLA ba dang shu dep kidei na ka BJP kaba la don ruh hynriew ngut kiwei pat ki graduate ryngkat bad saw ngut ki post graduate.
Ka National Conference kaba long kawei na ki party kaba jop bun eh ha katei ka elekshon da ki palat 40 ngut ka don 16 ngut ki MLA ba la dep ïa ka graduate bad san ngut ki post graduate.
Nangta phra ngut ki MLA na ka BJP ki la pyntip ba ki la pyndep ïa ka matriculation kum ka kyrdan kaba heh tam hynrei ha ka National Conference pat don tang uwei ha kane ka thup. Ka BJP ka don ruh saw ngut ki MLA kiba khlem pat pyndep ïa ka Class -12 katba ha ka NC ki don hynriew ngut.
