Nongstoiñ, Risaw 15: Ka jingangnud jong ki paitbah ka thaiñ Phodumbah ban ïoh ïa ka surok kaba bha naduh Mawlangsu haduh Rambrai kaba jngai kumba 11 kilomitar tam, ka la urlong hadien ka jingdawa ba khlem shong thait da ki sengbhalang bad ki Nongsynshar shnong ka thaiñ.
Ha kaba ïadei bad katei ka surok u nongthoh khubor u la pyrshang ban wad jingtip bniah la ka sorkar ka shimkhia ne em ïa ka jingdawa jong ki sengbhalang bad ki nongsynshar shnong, namar ki jingeh ba ki paitbah ki ïakynduh ha ka leit ka wan, ka kit ka bah na ka jingbym don ïa ka surok kaba biang.
Ha kaba ïadei bad katei ka surok la ïoh jingtip ba hadien ba ka sorkar ka la pynrung ïa katei ka surok ha ka thup jong ka Pradhan Mantri Gram Sadak Yojana, ka sorkar pdeng ka la shimti bad ka la mang pisa kumba 551.65 klur tyngka, na ka bynta ban pynbha bad siang rong ïa katei ka surok na Mawlangsu haduh Phodumbah kaba jngai kumba 5.40 kilomitar.
Katei ka jingmang pisa jong ka sorkar ka dei na ka bynta ka wat ba nyngkong, katba ïa ka 6 kilomitar kaba dang sah na Phodumbah sha Mawthungmarwei pat, na ka liang ka sorkar pdeng lyngba ka Ministry of Road Transport, ka dang ap ïa ka pisa na ka sorkar jylla katno ka lah ban ai lang na ka bynta ka jinglut ha ka ban bteng ïa ka jingpynbha bad siang rong na Phodumbah shaduh Mawtungmarwei.
Ynda ka sorkar jylla ka la ai jingmynjur ban ai lang ïa ka jinglut jingsep, ka Ministry kan sa bishar bad kheiñ bniah bha shuwa ba kan ai ïa ka jingmynjur ban bteng ïa ka jingpynbha bad siangrong ïa ka hynriew kilomitar tam kaba dang sah. Nalor kata la ïoh jingtip ruh ba na ka bynta katei ka san kilomitar tam kaba la dep mang ïa ka pisa, ka sorkar kan sa khot tender noh shen bad kino kino ki kontraktor kiba ïoh ban pyntrei ïa katei ka surok ki dei ban pyndep hapoh shi snem shiteng.
Ha kaba ïadei bad ka jingïoh ïa ka mang pisa na ka bynta ban pynbha bad siang rong ïa katei ka surok, na ka liang ka FKJGP Rambrai Circle lyngba u bah Jiedstarland Lyngkhoi president, ka la pynpaw ïa ka jingai khublei kaba kyrpang ïa ka sorkar jylla kaba la shimkhia bad pynurlong ïa katei ka jingangnud ki paitbah.
“Kumba ka seng ka la ju pynsngew sha ka sorkar na ka por sha ka por bad ka la phah ruh da ki jingthoh da ki phew sien ym tang ha u Executive Engineer jong ka tnad PWD, hynrei la bun sien bun wat ka la pynpoi ïa ki jingthoh shaduh u Myntri Rangbah ka jylla ruh ba un shim khia bad phai khmat lem sha ki paitbah katei ka thaiñ, kane mynta ka dei ka jubab ba ngi ioh”, u la ong.
“Ngim lah khlem da ai khublei kyrpang ïa u Bah Prestone Tynsong Symbud Myntri rangbah u ba dei peit ruh ïa ka tnad PWD u ba la shimkhia bad pynkloi ban mang pisa na ka bynta katei ka surok. Ka jingshimkhia jong ka sorkar ban pynbha ïa katei ka surok kan long ka jingkyrkhu kaba khraw ïa ki paitbah”.
“Hynrei tang kawei kaba ka seng ka sngew sah nud ka long, namar ba ka jingpynbha bad siang rong kam pat poi haduh Mawthungmarwei. Bun ki paitbah ka thaiñ Mawlangsu haba ki leit donkam sha Rambrai kaba dei ka Headquarter jong ka Block ki hap ban leit sha Tyllang Umlieh bad hiar sha Nongstoiñ bad phai pat sha Rambrai, kaba ka jingjngai ka la poi kumba sawphew phra kilomitar katba na Phodumbah sha Rambrai ka jingjngai ka don tang hynriew kilomitar tam”.
“Na ka liang ka seng ka da kyrpad jur ïa u maduh Prestone ba un sngewlem ban ïaleh katba lah ban pynsngew sha ka sorkar pdeng, ba kan pynkloi noh ban mang pisa ïa katei ka bynta kaba dang sah. Namar lada ka jingpynbha bad siang rong na Mawlangsu kan kut tang ha Phodumbah, kam don jingïapher na kaba ai ja shiteng kpoh ïa u briew u ba la jan ïap tyrsaw”, ong u President ka seng FKJGP Rambrai.
