Kumba 10 hajar ki nongleit nongwan na Shillong Airport shibnai kyrpad u CM ban ithuh kum ka International Airport

Shillong, Naitung 29: Ka Sorkar Meghalaya ka la buh ïa ka jingkyrpad sha ka Ministry of Civil Aviation ban ai jingithuh noh ïa ka Shillong Airport kum ka International Airport.
ïa kane la pyntip da u Myntri Rangbah ka Jylla Conrad K Sangma haba kren ha ka Annual Conference ba 20 jong ka Commonwealth Parliamentary Association (CPA) India Region Zone-III ba long mynta ka sngi Saitjaiñ ha Shillong.
U Myntri Rangbah ula pyntip ba ka Shillong Airport, kaba shakri ïa kumba 10,000 ngut ki nongleit nongwan shibnai, ka la lah ban pynïasoh ïalade da ka jingpynher liengsuiñ beit beit na Shillong sha ki Sor Heh ka Ri kum ka Delhi, Kolkata, Aizawl, Agartala, Imphal, Dimapur, Dibrugarh bad Guwahati.
“Ha ryngkat ka jingïatreilang bad ka Sorkar India, ngi lah shim mynta ïa ki sienjam ban kyntiew kyrdan noh ïa ka Shillong Airport khnang ba yn lah ban wan hiar ki liengsuiñ kiba heh. Nalor kata, ngi la ïakren ruh bad ka Ministry of Civil Aviation ban kyntiew kyrdan noh ïa ka Shillong Airport kum ka International Airport. Kane kan pynkhlaiñ ïa ka jingpynïasoh beit beit sha ki Ri ba marjan jong ka thaiñ Shatei Lam Mihngi bad kan nang pynkhlaiñ ïa ka Act East Policy” ula ong.
U Conrad ula kren ruh halor ka jingpyrshang jong ka Sorkar India hapoh ka Act East Policy ban bei tyngka ïa ki project bapher bapher lyngba ka Ministry of External Affairs, ban pynïasoh hapdeng ki Jylla ka thaiñ Shatei Lam Mihngi bad ki Ri ba marjan kum ka Myanmar bad Bangladesh. Kane kan kynthup ruh ïa ki jingplie ïa ka lynti ban kyntiew ïa ka ïoh ka kot.
Haba banjur halor ka jingkongsan ban shim ïa ki sienjam kat kum ka jingkotbor ka thaiñ, u Conrad ula kren halor ka jing donkam ban ïatreilang hapdeng ki kompani bad ka Sorkar ban pynsted ïa ka roi ka par jong ka thaiñ haba ban jur pat ïa ka jingkongsan ban pynbiang tarajur ban nym buh jingma ïa ki riti dustur jong ki nongshong shnong ka thaiñ.
Haba shim nuksa ïa ka jingjop jong ki karkhana rit ha ri Europe bad Asia, u Conrad ula ai jingmut ban wanrah ïa ki buit ha ka trei ka ktah bad ki jingtrei bapher bapher ban kyntiew ïa ka ïoh ka kot jong ka thaiñ Shatei Lam Mihhngi haba ïada pat ïa ka mei mariang ka thaiñ ka bym don sha kiwei kiwei ki jaka.
U Conrad ula pynpaw ruh ïa ka jingsngewnguh ïa u Myntri Rangbah Duh ka Ri bad ka Sorkar pdeng halor ka jingwanrah ïa ki buit bapher bapher, ki policy bad ki kam pynroi ba la mang beit thik tang ïa ka thaiñ Shatei Lam Mihngi.
Ula kren ruh halor ka jingkongsan ban kynshew pisa ha ki kam ba donkam ka thaiñ kum ha ka kam jngohkai, ki jingtrei ïa ki jingtei ba kongsan, ki kam shna jingbam na ki marbam bad kiwei kiwei.
Haba phai sha ki lad pynïasoh hapoh ka thaiñ, u Conrad ula ban jur halor ka Act East Policy jong ka Sorkar India bad ong ba ka thaiñ ka dei kaba riewspah bha ha ka jingdon ka umphniang, ka natural gas, dewiong, mawshun bad ki jaka rep ba pahuh bha.
U Conrad ula kdew ba bun na ka kam khaïi pateng jong ka thaiñ Shatei Lam Mihngi ka Ri India ka long bad ka Bangladesh, ka kam khaïi bad ki Ri ba marjan kum ka Bhutan bad Myanmar ki ju long lyngba ki jaka khappud kiba don shabar jong ka thaiñ.
Ban pynkhlaiñ ïa ka jingïadei bad ka Bangladesh, u Conrad ula ong ba ka Meghalaya ka la trei shitrhem ban pynkhlaiñ ïa ka kam khaïi pateng ha ki jaka khappud. “Kum shibynta na kane ka jingpyrshang, ka Sorkar kan sa pynbun ïa ki jingtei ba kongsan ha khappud da kaba pynkha kham bun ki Integrated Check Point (ICP) ha ryngkat ki Land Custom Station bad ki Border Haats” ula ong haba kdew ba la nang pynjanai ruh ïa ka jingpynïasoh surok na Dawki-Bholaganj bad Tura-Dalu nalor ka jingbuh ïa ka Integrated Check Post bad Border Haats ban pynkhlaiñ ïa ka kamai ka kajih ki nongshong shnong.