Kum ka jingai mynsiem ïa ka jingdawa ithuh ïa ka ktien Khasi, da ka jaka ai ka sorkar sha ka KAS
![](https://mawphor.com/wp-content/uploads/2022/05/mawphor-1.jpg)
Shillong, Nailar 25: Ka Sorkar jylla lyngba ka tnat Art and Culture mynta ka sngi Thohdieng, ka la pynbna ban ai ïa ka jaka kaba heh kumba 5000 Square Feet ha Tribal Research Institute, Mawlai Iewrynghep sha ka Khasi Author Society (KAS) ba kan tei ïa ka Ophis treikam jongka.
ïa kane la pynbna da u Myntri ka tnat Arts and Culture u bah Paul Lyngdoh uba la ïathuh ba kane ka jingai jaka ïa ka KAS ban tei ïa ka ophis treikam ka dei ruh kum ka jingai mynsiem ïa ka seng ha ka jingïakhun ban ïoh ïa ka jingithuh ïa ka ktien Khasi ha ka khyrnit kaba phra jong ka riti synshar ka ri India.
“Kum shi bynta ban nang pynshlur ïa ka KAS ha ka jingïakhun ban ïoh ka jingithuh ïa ka ktien Khasi ha ka khyrnit kaba phra jong ka riti synshar ka ri India, ka tnat Arts and Culture ka sorkar jylla ka la mang ban ai 5000 Square Feet sha ka KAS ba kan tei ïa ka ophis treikam hapoh ka jaka jong ka Tribal Research Institute kaba don ha Mawlai Iewrynghep mar pyrshah ka ktem ki Pulit CRPF” ong u bah Paul.
U bah Paul ula ong ba ka sorkar ka ngeit ba ka jingdon ka KAS ïa la ka ophis treikam kan nang pynkhlaiñ shuh shuh ïa ka KAS ha ka jingïakhun ban ïoh jingithuh noh ïa ka ktien Khasi. Ula ïathuh ruh ba ka KAS ka don jingthmu ban pynlong da ka National Seminar ha nongbah Delhi bad ban shongkyllaiñ myngngor ha Jantar Mantar kum ka dak ban pyni ïa ka jingïakhun ban ïoh ka jingithuh ïa ka ktien Khasi.
Haba kylli halor ka jingslem ban ïoh jingithuh ka ktien Khasi u bah Paul ula ong “Ngam kwah ban kynnoh ïano ïano ruh hynrei ka ktien kaba la dei ka Sobjek pule ha ka kyrdan Graduation Level hapoh ka Calcutta University ha ki snem 1900, ka la don hok shisha ban ïoh noh ïa ka jingithuh”.