Nongpoh, Jymmang 20: Hadien ka jingmih ka huri hura hapdeng ki ar kynhun jong ki nongñiah auto ha ka thaiñ Nongpoh hapoh ka lama ka Nongpoh Region Auto Owners and Driver Association (NRAO&DA), naka jingkynnoh kam nongïalam jubor u Bah Marcus Marten hadien ba kawei pat ka kynhun ka la jied ban pynthymmai ïa ki nongkitkam bad wat ki kot ki sla ba la aibor ruh da u Deputy Commissioner ka Ri-Bhoi District, kitei ki ar kynhun mynta ka sngi ki la mih shakhmat ban leit kynduh ïa u ADC ka Ri-Bhoi ban ïakren bad pynbeit ïa katei ka kam huri hura.
Haba kren sha ki lad pathai khubor ki nongïalam ka NRAO&DA kiba kam ïa ki kot ki sla ba biang naduh u Bah Banasar Lyngdoh Nonglait President, u Bah Tony Shylla Vice President, ki la ong ba ki dap ka jinglyngngoh kaba khraw mynta ka sngi ba la ka la don ka jingïaid rally jong ki auto hapoh ka jingïalam u Bah Marcus Marten, kaba ki la kam ruh ba u shu lum briew na kiwei kiwei ki jaka kum na Byrnihat na ka thaiñ 20 mer namar ba ym don shuh ba kyrshan ïa u ha ka thaiñ Nongpoh.
Ki la ong ruh ba hapoh ka jingïalam jong u ha ki por ba mynshuwa, kam don satia ka khuid ka suba ha ka rukom treikam naduh ka pisa haduh ki kot ki sla kiba la shui ap khlem pynthymmai shuh bad naka liang jong ki ki la phah ban pynlong da ka jingïalang ban lum ïa ki nongñiah auto hynrei khlem patiaw eiei bad dei halor katei ka nongrim kum ki nongñiah auto ki la rai ban jied bad pynthymmai ruh ïa ki nongkitkam bad dei tang hadien ba la dep ban jied thymmai ïa ki nongkitkam la lah ruh ban pynthymmai ïa ki kot ki sla bad ioh ruh ka jingithuh na u Deputy Commissioner ka Ri-Bhoi District.
Ki la kyrpad ruh sha ki nongñiah auto ba na kiwei ki jaka ba kim dei ban mushlia ïa ka kynhun kaba kamai ha Nongpoh, hynrei ba ki dei ban peit ïa ka bha ka miat jong ka kynhun ka jong ki ha ka jaka kaba ki kamai, khamtam ka thaiñ Byrniha tba wat ka pliang ja jong ki ruh la shah knieh ha ki nongkamai auto naka jylla Assam.
U Legal Adviser jong ka kynhun kitei ki nongïalam ba la jied thymmai u L. Shakhwa u la pynshai paidbah ba katei ka kynhun ka dei kaba dei hok, namar ki don ïa ki kot ki sla kiba biang hadien ba ki kot barim ki la ïap noh namar kam don satia kano kano ka jingpynthymmai, bad dei halor katei ka nongrim ba ki kynhun ki la pynthymmai ïa ki kot ki sla kiba la iap noh bad ioh ruh ka jingithuh naka sorkar.
U Bah Marcus Marten uba la kam ruh ba u dang dei u nongïalam ki nongñiah auto u la kynnoh ba katei ka jingleit pynthymmai jong kitei kiwei pat ki kynhun ïa ki kot ki sla ka dei tang ka jingleh tuh khlem ka jingtip lang jong baroh, ha kaba ki la shu lum tang ar tylli ki unit ban jied ïa ki nongïalam ba thymmai, bad kynthoh ruh ïa u shimet ha ki lad pathai khubor ba ki la dep ai ïa ki kot ki sla, ha kaba u la buh jingkylli la katno tylli ki la ai ïa ki kotï Bad naka liang jong u, u la kyrpad ruh sha u Deputy Commissioner ka Ri-Bhoi ban pynbeit kloi ïa katei ka kam mano ba dei ka kynhun kaba shisha.
U la ong ruh ba katei ka kynhun kaba thymmai ka dei kaba la shu leh tuh ïa ki kot ki sla khlem ka jingtip lang jong baroh, hynrei la shu jied tang katto katne tylli ki unit bad bun naki nongïalam jong katei ka kynhun ki dei kiba dang kamai auto dang shen bad kim pat tip ïa ka dang ka duh.
