Shillong, ïaïong, 11: U Vice Chancellor jong ka North Eastern Hill University (NEHU) u Prof Prabha Shankar Shukla ha ka sngi Thohdieng u la kyrpad ïa baroh ki kynhun kiba don hapoh ka skulbah ban pynneh ïa ka shongsuk shongsaiñ bad ka jingïaid beit ka pule ka puthi bad kular ruh ban thaw ïa ka “Truth and Reconciliation Committee” ka ban khmih bniah ïa ki jingpynsngew bad ban plie ïa ka lynti sha ka jingïasuk.
Ha u kyrwoh, u Prof Shukla u la tyrwa ba ka jingthaw ïa ka “Truth and Reconciliation Committee” kan kynthup ïa ki nongbishar ba la shongthait, ki stad kot, ki nonghikai kiba la kham rangbah ban shong bishar ïa ki jingpynpaw bad ban ai jingmut kumno ban pynkoit ïa ki jingmong ha ka skulbah.
U la kular ruh ban khot ïa ka Special Session jong ka Academic Council bad ka Executive Council, ki ban long ha kajuh ka por hapdeng ki nongmihkhmat jong ki samla pule
Sha ki samla pule u Vice Chancellor u la ong ba ki jingpynsngew jong ki samla pule ki long kiba kongsan, hynrei ki jingïakhih ki dei ban long kiba jaijai, kiba don jingmut bad kiba long katkum ka jingsynshar paidbah. “Wat shah ïa ki bor kiba nabar ban rong noh ïa ka kynhun jong phi lane ban shah ïalam bakla ïa ki jingdawa,” u la ong.
Sha ki nonghikai bad ki nongtrei, u la ong, “to ngin khie joit halor ka jingshah pharia ban pynskhem biang ïa ka thong pule jong ngi. Ngin nym ailad ba ka politik shiliang kan pyndum ïa ka jingbishar bniah jong ngi ha ka kam. Ka lawei jong ki samla pule jong ngi ka dei ban long ka jingthmu ba kongsan tam jong ngi.”
U la kyntu ïa ka kynhun ki samla pule bad ïa ki nongïalam jong ki kynhun bapher bapher da kaba ong, “ to ïashim bynta ha ka jingïakren kaba don jingmut. Kiar na ki jingkren beiñ bad jingbyrngem. Phi bat ïa ka jingkitkhlieh kaba khraw. Pyndonkam da ka jingstad ïa ka.”
“Sha ki bor bishar bad ki bor pynjari ain: Ngi pan ïa ka jingkyrshan jong phi ban pynthikna ba ka ain kan neh hapoh u pud u sam jong ka skulbah. Manla ki kam be-ain, watla ka long kaba la wanrah da ka saiñpyrthei, dei ban leh katkum ka riti synshar ka ri,” ong u Prof Shukla da kaba bynrap “sha ka Sorkar India bad ka Ministry of Education: Nga ai ïa ka jingïatreilang bapura ban pynlong ïa ka jingtohkit bad ka jingpynbha ïa ki tnat treikam. Ka NEHU ka ieng na ka bynta ka jingtreikam kaba khuid bad kaba shai.”
U la ong ruh ba ka ladei ka por ban phaidien. Ki jingjia ha ki khyndiat bnai ki la ktah ïa ka jingshaniah jong ka skulbah. Ki la pynpaw ruh ïa ka jingdonkam kyrkieh ban kiar na ka jingleh politik ha ka pule puthi bad ban pynthikna ïa ka jingtohkit, ka jinglaitluid ha ka pyrkhat pyrdaiñ bad ka hok.
