Shillong, Ïaïong, 11: U Symbud Lamphang jong ka Iingdorbar Thawaiñ ka Jylla u Timothy D. Shira ha ka sngi Thohdieng u la leit mih hakhmat ka Kashari jong u Chief Justice Magistrate, Shillong ban ai ïa ka jubab na ka bynta ban bishar bin pa bin ha kaba ïadei bad ka jingujor mukotduma pyrshah ïa ki arngut ki YouTuber halor ka jingkynnoh ba ki la pynsaphriang ïa ka khubor lamler halor ka jingkren jong u ha ha ka jingïatai hapoh ka Iingdorbar Thawaiñ na ka bynta ban pynlong ïa ka nongbah Tura kum ka nongbah Tlang ne ka Winter Capital jong ka jylla.
Ha ka jingïakren bad ki lad pathai khubor, u Legal Counsel jong u Symbud Lamphang, u Sujit Dey u la ong, “mynta ka sngi, u Symbud Lamphang u la ai ïa ka jubab hapoh ka Section 323 jong ka BNSS bad ïa ka jubab jong u la buh jingthoh bad mynta ka Kashari kan sa bishar bniah ïa ka.”
“Ha ka jingtohkit, yn bishar bniah ïa ka jingkren jong u bad ka Kashari kan sa pynmih ïa ka rukom treikam lada ka sngewhun ba ka don ka jingpynjah burom pyrshah ïa u nongujor jong nga,” u la bynrap.
Haba kylli, u Dey u la ong, “ki don ar tylli ki mukotduma (ba la ujor da u Symbud Lamphang), kawei ka dei ka Criminal bad kawei ka dei ka Civil. Ngi ïakren mynta shaphang ka Criminal Case. Dang shen, ka dei ka Civil Case haba ngi la kam ïa ka jingdawa bailutksan namar ka jingshah pynjah burom jong u nongujor jong nga. Ha kata ka jingujor ba shah pynjah burom ngi la dawa mar T. 100 klur na ki arngut ki nongshah ujor.”
Haba kylli biang hato ka don neem ka lad ka lynti ban ïapynbeit da ka jingsngewthuh jingmut shabar jong ka Kashari, u Symbud Lamphang u la pynskhem ba kan ym don kano kano ka jingïapynbeit namarba ki arngut ki nongpyndonkam ïa ka Social Media kim shym la pynpaw ïa ka jingsngewsih ne ka jingbabe halor ki jingkren ba ki la pynmih.
“Kim (nongpyndonkam social media) don satia kano kano ka jingsngewsih, (kam don) kano kano ka jingpynpaw ba ki ba la babe. Kumta kumno ngin poi sha ka jingïasngewthuh jingmut? Kan ym don kano kano ka jingïasngewthuh jingmut. Ka la pynsniew ïa ka dur jong nga haduh katta katta ba nga hap ban pyrkhat arsien-lai sien ban poi sha ka jingïasngewthuh jingmut. Na ka bynta kata nga lah ban ym lah ban poi sha ka jingïasngewthuh jingmut,” la ong u Symbud Lamphang.
Da kaba bynrap halor kane, u Dey u la ong, ‘ym dei tangba ka la pynjah burom ïa u nongujor jong nga hynrei ka la pynjah burom ruh wat ïa ka iing ka sem jong u baroh kawei.”
“Mano mano ruh ki don ka hok ban pynpaw ïa la ka jong ka jingsngew ha ki mat bapher bapher kiba lah ban long kum ki jingïatai ha ka social media hynrei kim dei ban pynmong ne ban pynjah burom ïano ïano ruh. Ki lah ban kren tangba kim dei pat ban pynjah burom ïa kiwei,” u la ong.
