Shillong, Jymmang 23 : U Myntri kam rep kam riang jongka sorkar jylla u bah Banteidor Lyngdoh uba dei u MLA ka Mawkynrew Constituency mynta ka sngi u la ïa kynduh ïa u myntri ka sorkar pdeng u Pashupati Kumar Paras uba dei peit ïa ka Food Processing ha nongbah Delhi bad ha kane ka jingïakynduh bad ïakren u myntri ula kular ban ïarap ïa ka jylla Meghalaya ban seng ïa kiba bun tylli ki karkhana pynmih marbam bunjait ne ki food processing unit.
Haba ïakren bad u nongthoh khubor u bah Banteidor u la ong “ Nga la ïakynduh ïa u myntri ka sorkar pdeng u Pashupati ha Pancheel Bhavan bad nga la ïoh ban ïakren bad u bun por bha ha kaba ïadei ban ïarap ïa ka jylla ban ïoh ïaki karkhana pynmih marbam bunjait kum ki karkhana shna wain, shna umsoh na kiba bun ki jaitsoh khamtam u sohtrun uba mih bun bha ha ka jylla bad kiwei kiwei ki mar rep kiba mih na ka jylla. Namar nga la pynpaw hakhmat jongu ba ki don bun ki samla ne ki kynhun kiba seng kam seng jam bad ïeng ha la ki kjat hynrei kim don lad ban seng ïaki karkhana pynmih marbam bunjait. Na ka liang u Myntri ka sorkar pdeng ula pynpaw ba u kloi ban ïarap bad u la kyntu ïa u myntri ka sorkar jylla ban pynkhreh ïa ki jingthoh ba bniah bad phah ïa ki sha u khnang ba un ïoh ban mang ïa ki skhim namar ki don ruh ki skhim ban ïarap ban seng ïa kum kine ki karkhana kiba ka sorkar pdeng ka ai subsidy”.
Na ka liang u bah Banteidor u pynpaw ka jingsngewnguh ia u myntri uba la kular ban ïarap ïa ka sorkar jylla khnang ban ïoh ïarap ïa ki samla ba kin seng kam ne ïa ki Cooperative Society, ki SHG bad ter ter.
