Kular u Modi ban kyrshan ïa ka Sorkar Meghalaya na ka bynta ki projek ha New Shillong

Shillong, Nohprah, 14: U Myntri Rangbahduh ka ri u Narendra Modi u la kular ban ai jingkyrshan ïa ka Sorkar Meghalaya khnang ba kan dup lah ban kynjoh sha ka thong ha kaba ïadei bad ka jingthmu ban tei ïa Administrative City ha New Shillong Township ha ki san snem ban sa wan.
U Myntri Rangbah ka Jylla u Conrad Kongkal Sangma uba la leit sha Delhi ban ïakynduh ïa u Myntri Rangbahduh ka ri, u la ong ba u la pynsngew ha u Myntri Rangbahduh shaphang ki kam pynroi bapher bapher bad ïa ki prokram bapher bapher jong ka Sorkar.
“Nga la aiti ïa ka kaiphod ba bniah bad nga la pyni ruh ïa ka Presentation ha u bad u la pynpaw ka jingsngewkmen ban ïohi ïa ki jingtrei bapher bapher kiba la urlong ha kane ka jylla bad u la pynpaw ka jingsngewkmen khamtam eh ba baroh ki kam pynroi ba la mang pisa na ka bynta ka jylla ha ki san snem ba la leit noh ka la nang kiew ar shah ha ki san snem ba ladep, kaba la jan kot lai shah na kaba ju long ha ki 5-6 snem mynshwa,” u la ong.
U Sangma u la ïathuh ba u la pyntip ha u Modi ïa ki jingthmu jong ka Sorkar Meghalaya bad ki thong bapher bapher ba la buh ban pyndep ha ki san snem ki ban sa wan. “(Nga la) kyrpad ïa u Modi ban tuklar bad ban ïarap lem ïa ngi, ban kdew lynti ïa ngi bad ban kyrshan lem ïa ngi ba ngin dup lah ban kynjoh sha ka ka thong kaba ngi la buh ha ki san snem ki ban sa wan,” u la ong.
“Nga la ïasam ruh bad u halor ka jingthmu ban don ïa ka New Shillong Township ha kaba ngi la thmu ban tei ïa ka Administrative City ba thymmai bad ka Secretariat ba thymmai bad nga la ïasam bad u ïa ka Plan bad ka Designs ba la shu leh malu mala bad pan jingkyrshan na u ban pynthikna ba ki projek kin nang tyllun shakhmat. U la pynpaw ka jingsngewkmen ban ïohi ïa kine ki kam pynroi bad u la kular ruh katba lah ban ai jingkyrshan na ka liang jong u,” u la bynrap.
Shuh shuh, u Myntri Rangbah u la ïakynduh ruh ïa ka Myntri Pla Tyngka ka Nirmala Sitharaman bad kyrpad ïa ka ban kyntiew ïa ka jingbhah pisa bad ban ai tam ïa ka Externally Aided Projects (EAP) sha ka Jylla Meghalaya da kaba pynshong nongrim katkum ki kam ba ladep leh.
“Nga la pyntip ïa ka shaphang ki projek bapher bapher kiba dang ïaid shakhmat lyngba ka bhah pisa ba ka Sorkar India ka ju ai jingkyrshan ïa ki jylla bapher bapher lyngba ka EAP bad ïa ki kam pynroi bapher bapher kiba la nang ïaid shakhmat,” u la ong.
“Ka Myntri ka la shah skhor bha bad ka la kular ban ïarap bad ban kyrshan ïa ngi. Ngi khmihlynti ïa ka jingkyrshan jong ki bad na ka Tnat Pla Tyngka bad na u Myntri Rangbahduh ka ri khnang ba ngin dup lah ban kynjoh ïa ki thong bapher bapher ba ngi la buh na ka bynta ka jylla Meghalaya,” u la bynrap.