Kular u DC ban weng ïa kyndon ‘Work experience’ hadien ka jingïakynduh bad ka EJNC
Khliehriat, Naitung 3: Ka East Jaiñtia National Council (EJNC) CEC hapoh ka jingialam u Vice President, u bah Ency Shadap, mynta ka sngi ka la leit ban buddien biang na u Deputy Commissioner ka East Jaiñtia Hills District ha kaba ïadei bad ka shithi laitkam (dated, 20 June 2023 Ref No. EJHD/DRDA/702/2022/5) ba la pyllait da ka ophis jong Deputy Commissioner kaba khot thep kam tang ïa kito kiba la don jingtbit lypa lane kiba la don experienced ar snem.
La ong ba ha ka jingïakynduh ki nongialam ka EJNC bad u Deputy Commissioner, u Abhilasah Baranwal, IAS mynta ka sngi bad haka jingïakren kaba sani bha, na ka liang u Deputy Commissioner u la kular ban shimkhia ïa kane ka kam bad u la kular ruh ban weng noh ïa ka tei ka kyndon ‘work experienced’, bad u la ong ruh ba un sa bthah noh ïa kito kiba dei ban peit ïa kane ka kam ba kin pynbna ne advertise noh da kawei pat (fresh notice) kaba yn ym don shuh ka kyndon work experience.
Naka liang u Vice President ka seng bah Ency Shadap u la ai ka jingiaroh ïa u DC uba la shimkhia ïa kane ka kam kaba bha khnang ba ki samla ka thaiñ kin ym sngew duh jingkyrmen haba ki thep ïa katei ka kam kaba lait.
Ka seng ka la kyntu bad ban jur ruh ba dei ban pynkloi noh ïa ka kam ha kaba ïadei bad kane ka kam khnang ba kan kham kloi ka ban long ruh na ka bynta ka jingbit ka jingbiang khamtam ïa ki samla wad kam jong ka thaiñ.
Kum ban shu phai dien, ka East Jaiñtia National Council ka la dep ban buh ruh da ka dorkhas myn ha ka 30 tarik u naitung 2023 ha kaba ka seng ka la dawa ba dei ban weng noh shisyndon ïaka tei ka kyndon kaba la pynbna ba tang na ka bynta kito kiba la don jingtbit lypa ne kiba la don ka work experience.
Katkum ka shithi sha u Deputy Commissioner ba la soi kyrteng da u Vice President EJNC, u bah Ency Shadap, ka seng ka la pynpaw ba katkum ka jingpynbna ka tnat District Rural Development Agency (20th June 2023 Ref No. EJHD/DRDA/702/2022/5) ka la khot application halor ka kam Junior Engineer bad Lower Division Assistant (LDA) ha Lumshnong C & RD Block, East Jaiñtia Hills District kiba dei ha ka contractual basis, na ka liang ka EJNC ka kren tang ïa ka post Lower Division Assistant (LDA), namar ba ka tnat DRDA ka pan ïa kiba don jingtbit ne experience lypa ar snem ha ka kam, halor kane ka seng ka pynpaw ba “Kiba bun kiba la nang la stad kiba hapoh ka district bad shabar ka district ki dei kiba ym pat don jingtbit eiei na ka daw ka jingkyrduh kam la ka dei ka kam sorkar ne kano kano ka kam private, te kane kan pynlong ïa kiba bun ki nongthep kam ba kin nym don kano kano ka jingtbit ha ka kam kaba long katkum ka jingpan na katei ka tnat, kane kan ktah ïa ki samla wad kam kiba la biang ka kyrdan pule kiba don ka hok ban thep ïa katei ka kam bad kiba don hok ban ioh ïa ka kam sorkar, namar kane ka ktah ïa ki samla wad kam kiba hapoh ka district ki bym pat don ne ki bym pat shym ioh jingtbit (experienced) bad kiba la biang ka kyrdan pule ban thep ïa katei ka kam.