Nongpoh, Jymmang 22: Ka long shisha ka jingkmen ïa ki paidbah nongshong shnong, ki nongïalam shnong, ki nonghikai bad ki khynnah skul, ha kaba mynta ka sngi na ka liang u Myntri rangbah ka jylla, u Conrad K. Sangma u la kular ban phai khmat kyrpang ka sorkar ban ïarap sha ki ar tylli ki skul ha ka Shnong Nongspung-A ba hap ha ka Jirang Constituency.
U Myntri Rangbah ka jylla, u la khlei ïa kitei ki juban lak mynta ka sngi, ha ka jingleit jurip ïa ka shnong Nongspung-A, kaba dei shi bynta ka thong jong ka CM Connect, ba u myntri rangbah da lade u la leit ban jurip bad ban ïa kynduh ïa ki nongshong shnong na ka bynta ban tip kham bhai a ki jingeh ba ki ïa kynduh ha ki shnong ki thaw.
Kine ki ar tylli ki skul ha katei ka shnong ba u Myntri rangbah, u la kular ki kynthup ïa ka Govt. LP School bad ka SSA UP School, kiba don ha katei ka shnong Nongspung-A, ba ka jinglong jingman katei ka skul la isangsot ïa ki khynnah kiba wad ïa ka jingstad na ka daw ka jingjot rathai ba la donkam ban maramot ne pynbha noh ïa ka.
Haba kren ha kane ka sngi, u Myntri rangbah ka jylla, u Conrad K. Sangma, u la ong ba kane ka jingwan jurip sha ki shnong ki thaw ha ki shnong nongkyndong, ka dei shi bynta ba un tip kham ba ïa ki jingeh jong ki paidbah ha ki shnong nongkyndong bad kumba u la lap da la ki khmat u la kular ban leh ei ei na ka bynta kitei ki 2 tylli ki skul, nalor kiwei kiwei ki jingduna kiba don hapoh katei ka ka shnong.
Haba kular ban ïarap ne pynbha ïa kitei ki skul, u Myntri rangbah u la ong ba un sa bishar bniah ban ïarap la ka long na ka CM-Connnect, ka SSA Scheme bad kumjuh ruh wat na ka scheme MLA, ha kitei ki skul ki la donkam shisha ïa ka jingïarap na ka bynta ban pynbha bad ban pynitynnad ïa ka skul, khnang ba ki khynnah kin lait na u slap ka sngi bad khamtam ba katei ka skul ka la jot rathai ba la donkam ban maramot ne pynbha.
Haba leit jurip ïa katei ka shnong, ba la lap shibun ki jingduna khamtam kitei ki skul pule, la synran lang ruh ïa u Myntri rangbah da ka jingdon lang u MLA ka Jirang, u Bah Sosthenes Sohtun, u Deputy Commissioner ka Ri Bhoi u Abhilash Baranwal, u Raja Brahma, Project Director ka DRDA lem bad kiwei kiwei ki ophisar sorkar.
