Nongpoh, Jymmang 22: Hadien ka jingud jingnam jong ki paidbah nongshong shnong ka shnong Pahamjula kaba don ha Jirang Constituency kaba dei ruh kawei na ki shnong ba dang sahdien, ban tuklar lem hadien ba ki paidbah katei ka shnong ki hap ban shong ban sah hapdeng ka jingdum na ka jingsniew u transformer 18 snem mynshuwa, u Myntri Rangbah ka jylla u Conrad K Sangma mynta ka sngi dalade u la leit ban poi hi sha katei ka shnong kyndong kaba don kumba 77 tylli ki longiing ban tip ïa ka jingeh jong ki.
La ong ruh ba ki paidbah ha katei ka shnong ki hap ban im man ka sngi khlem bording elektrik naduh u snem 2007 bad im hapdeng ka jingdum ha ka por mynmiet, hynrei hapoh ka jingïalam jong u Bah Sosthenes Sohtun kum u MLA ryngkat ki paidbah nongshong shnong ki la leit ban ïakynduh ïa u Myntri Rangbah ha ka sngi 16 tarik mynta u bnai bad mar mar na ka liang u Myntri Rangbah u la shimkhia ïa katei ka jingeh ki paidbah bad la lah ban shna noh ïa utei u transformer bad ki paidbah ki la ïoh biang ïa ka jingshai tang hapoh 3 sngi.
Hadien ka jingleit jngoh hi u Myntri Rangbah dalade ïa katei ka shnong, ki paidbah mynta ka sngi ki la pdiang burom ïa u Conrad K Sangma da ka mynsiem ka jingsngewkmen bad pynpaw ruh ka jingïoh mynsiem hadien 18 snem ba ki la shah ieh beiñ bad ka jingïoh biang ïa ka bor jingshai ka long kum ka khyllipmat ba la tan ïa ki na dujok.
Haba kren ha katei ka sngi na ka liang u Conrad Sangma u la pynpaw ba ki paidbah ha katei ka shnong ki mad jingeh, bad pynthikna ïa ki nongshong shnong ba ka dei ka kamram jong ka sorkar ban weng ïa ka jingeh jong ki paidbah da kaba bynrap ruh ba kum kine ki jingshah lehbeiñ ki dei ki bym lah satia ban pdiang.
U la ong ruh ba ka sorkar ka don ka jingkitkhlieh ban sngap bad pynbeit ïa ki jingeh ba ki paidbah jong ngi ki mad, bad kane ka jingleit jngoh ka long shibynta jong ka CM-Connect Impact, kaba long ruh kum ka jingkular jong ka sorkar ban pynpoi ïa ka roi ka par sha ki jaka ba kham kyndong bad kiba shem jingeh bad khamtam ba ki paidbah kin don ka jingïadei kaba jan bad u myntri rangbah.
U Myntri Rangbah ka jylla u la pynpaw ruh ia ka jingkmen ba u la lah ban kynduh markhmat bad ki paidbah ka shnong Pahamjula, “ka dei ka khyllipmat kaba rit hynrei kaba don jingmut bad nga dap da ka jingkmen ban don ha ka shnong Pahamjula jong ka Jirang Constituency” ong u myntri rangbah da kaba bynrap ruh ba ka la pynhun ïa ka mynsiem jong u ba ka jingangnud ki paidbah hadien 18 snem ka la urlong.
Na ka liang u Bah Sosthenes Sohtun kum u MLA u la pynpaw ka jingsngewkmen kaba khraw halor ka jingkloi u myntri rangbah ban leit jngoh hi ïa katei ka shnong bad ai ruh ka jingïaroh ïa ka jingtrei shitom jong u ban wanrah ïa ka roi ka par hapoh ka constituency, bad donkam ban dang bteng ban theh ki kam pynroi khamtam khamtam ki surok ban pynïasoh sha ki shnong bapher bapher bad kumjuh ruh ban wanrah jingshai sha ki shnong kiba khlem bording elektrik.
