Shillong, Nailur, 21: Ka Sorkar Jylla ka la kular ban aiti ïa ki kaipod tohkit sha baroh ki 60 ngut ki nongmihkmat ka Jylla halor ka jingkynnoh ba ka don ka jyrsieh bamsap ïa u khaw bad ka jingdkoh treikam ha ka Meghalaya Energy Corporation Limited (MeECL) .
U Symbud Myntri Rangbah ka Jylla u Bah Prestone Tynsong ha ka jingïakren bad ki lad pathai khubor ha ka sngi Balang u la ong ba ïa kane ka rai la shim hadien ba katto katne ki dkhot jong ka Iingdorbar Thawaiñ ki la rah ïa kane ka jingdaw ha ka Dorbar Synrai ba dang shu kut dang shen jong ka Ingdorbar Thawaiñ.
“Halor kane, ka Sorkar ka la rai ba ïa kine ki kaiphod yn sa phah sha baroh ki MLA la dei ka kaipod jong ka MeECL lane ka kaiphod tohkit bamsap khaw. Ka tnat Political kan sa leh ïa kaba donkam,” ong u Bah Tynsong.
Ha ka 29 tarik Lber, mynta u snem, ka Independent Inquiry Committee ba la khlieh da u Justice RN Mishra ba la shongthait ka la aiti ïa ka kaiphod halor ka jingdkoh treikam jong ka MeECL sha u Myntri Rangbah ka Jylla u Conrad K Sangma ha New Delhi.
Ïa kane ka Committee la thung ha ka 29 tarik, Naitung, ha u snem baladep.
Ïa ka Committee la bynshet ban tohkit, ban rekod ïa ki jinglap bad ban ai jingkynthoh ha kaba ïadei bad ka jingthied ïa ki tiar, ka AT&C losses bad ka jingtreikam jong ka MeECL, bad ki shnat treikam kiba kynthup ïa ka Meghalaya Power Generation Corporation Ltd (MePGCL), ka Meghalaya Power Transmission Corporation Ltd (MePTCL) bad ka Meghalaya Power Distribution Corporation Ltd (MePDCL).
Ka Independent Inquiry ba la khlieh da u Justice (Retired) Mool Chand Garg ka Madhya Pradesh High Court la thung da ka Sorkar Jylla ha ka 29 tarik, Naitung.
La bthah ïa kane ka Independent Inquiry ban tohkit halor ka jingaiti ïa u sha ka Continental Milkcose (India) Ltd na ka bynta ka Supplementary Nutrition Program (SNP) ïa kaba la lap ïa une u khaw ha kawei ka kudam buh khaw shimet kaba don ha Boko, Assam bad ba la kurup da ki Pulit Assam.
