Kular ka sorkar Assam ban ïa trei lang na bynta ka jingïaid beit ka elekshon MDC ha ka Jylla : CS

Shillong, Rymphang 19 : U Chief Secretary ka Jylla, Bah DP Wahlang u la lum ïa ka jingïalang pyrkhat kam kaba ïadei bad ka jingpynkhreh ïa ka elekshon MDC ha ki ar tylli ki Autonomous District Council (ADC), kata ha KHADC bad JHADC ha kaba u la pyntip ruh ba na ka liang ka sorkar Assam ruh ki la kular ban ka jingïatrei lang khnang ba kan ym don ka jingpynwit ïa ka iaid ka ieng jong ki kynhun ba pynïaid ia ka elekshon.
Haba kren bad ki lad pathai khubor, u Chief Secretary u la ong, “Ngi la lum ïa ka jingïalang pyrkhat hynin ka sngi haba iadei bad ka jingpynlong ïa ka elekshon ha rilum Khasi bad Jaintia bad ngi la sngewhun ruh halor ka jingpynkhreh naba wat ïa ki bor pahara ruh la dep ban phah sha ki jaka ba donkam.”
U la pyntip ruh ba ka sorkar jylla ka la dep ban shimkhia ruh haba ïadei bad ki polling station kiba don jingsyier bad kiba lah ban mih jingkulmar bad kumjuh ki jaka thep vote kiba don ha khappud ka Assam bad Bangladesh da kaba pyntikna ïa ki bor paharakiba biang.
Lah ban kdew hangne ba ka jingïalap elekshon na bynta ki seng saiñpyrthei bapher bapher ka la kut noh ha ka por 4:00 baje janmiet jong ka sngi Balang bad bun ki kynhun pynïaid elekshon ki la mih ban leit sha ki polling station ban pynkhreh na bynta ka sngi thep vote kaban long ha ka 21tarik mynta u bnai.
“Ki kynhun pynïaid elekshon bun ki la pynkhreh ban mih bad don ruh kiba la mih ha kane ka sngi katba 80 persen kin mih ha ka sngi Balang,” ong u Chief Secretary.
Ha kajuh ka por u la khot la wer ïa baroh ki nongthep vote ba kin mih ryntih ha kane ka sngi thep vote da kaba buh hakhmat ban jied ïa ki kyrtong kiba ki kyrshan.
U Chief Secretary u la pyntip ruh ba u la dep ruh ban kren bad u Chief Secretary ka Assam haba ïadei bad ka elekshon MDC ha rilum Khasi bad Jaintia.
Katkum ka jingong jong u, na ka jylla ki la pyntip ruh shaphang ka ïaid ka ieng jongki bor pynïaid elekshon bad kumta ki la ïoh ïa ka jingkular ba kan ym don ka jingthut ha ka leit ka wan jong ki. “Don ki kynhun kiba hap ban ïaid lyngba ka Assam bad kumta ngi la ïoh ïa ka jingkular ban ïoh pura ka jingïatrei lang na ka Assam bad ba ka kam kan long kaba ïaid beit,” u la ong.
Da kaba kam ba ym don satia kano kano ka jingïoh kurup kyiad lane ka pisa, u Chief Secretary u la ong ba ki la buh bun ki nongpeit pyrman bad ki khyrdop talasi kali hynrei kam shym la don kano kano ka jingïoh kurup kumba long ha ka elekshon MLA ne MP. U ong ba kane ka jingbym ïoh ban kurup ei ei kadei namar bun ki kyrtong ki pynlong da ka common platform bad kumta ka jingpynlut ruh ka kham duna shibun.