Kubur u Myntri ba noh shilliang ka rukom siew tulop hapdeng ki nonghikai

Shillong, Nailur 05 : U Myntri ka tnad Pule Puthi ka jylla, Rakkam A Sangma ha ka sngi Ba-ar u la kubur ba ki nonghikai ki dei shisha ki païa ba skhem kiba noh synñiang na ka bynta ban tei ïa ka ri kaba khlaiñbor.
Haba kren kum u Kongsan ha ka jingrakhe ïa ka sngi kyrpang jong ki nonghikai kaba long ha Soso Tham Auditorium u Myntri u la kubur pat ba ki nonghikai ki kynduh shisha shibun ki jingeh, kata kynthup naduh ka jingnoh shilliang ka rukom siew tulop hapdeng ki nonghikai bad haduh ka jingslem ban siew ïa ka tulop jong ki.
Kumta halor kane u la ong ruh ba kadei ka thong jong ka sorkar ban pynbeit ïa kane ka ishu. Ha kajuh ka por u la kyntu ruh ïa ki nonghikai ban pyndonkam da kiba bun ki lad na ka bynta ban pynjanai shuh shuh ïa ka kamra kum ki nonghikai.
“Ki nonghikai ki don ka bynta kaba khraw tam naka bynta ban pynwandur ïa ka lawei jong ka Ri lyngba ki samla pule naduh ba ki dang lung la ka long ha ka bor pyrkhat haduh ka jingnang jingtip ba kin lah ban poi sha ka thong,”u la ong.
U Myntri u pynpaw ruh ïa ka jingmen halor ka jingshah jied jong u Madhav Singh, Senior Science Teacher jong ka skul Alpha English Higher Secondary, Nongpoh ban pdiang ïa ka khusnam National Teacher Award 2023. Ha kane kajuh ka sngi u Myntri u la pyllait paidbah ruh ïa ki skim bapher bapher ba hap ha ka SSA kynthup naduh ka website jongka Samagra Shiksha Abhiyan, nangta ka Adopt a School Campaign bad ruh ïa ka PM e-Vidya Meghalaya.
Ka sorkar jylla ka la pynkup burom ruh da ka khusnam kyrpang sha kito ki nonghikai kiba la pyni shisha ïa ka jingtbit jong ki kum ki nonghikai.
Ki nonghikai kiba ïoh pdiang ïa ka State Award ki kynthup ïa ka V. Dipali Sharma Rao, Principal, Laban Assamese Girls’ Higher Secondary School, nangta Kong Belinda Kharsati, Head Teacher, Pomlahier L.P School, Babu Sisingh Ryntong, Asst. Teacher, New Nongstoin ‘B’ Govt. L.P School, Babu Apborsing L. Mawlong, Asst. Teacher, Tirot Sing Memorial Govt. U.P School, Nongkhlaw, Babu Kwirin Diengdoh, Headmaster, Mawsaw Govt. U.P School, Mawkyrwat, Kong Ewanmidaka Mukhim, Asst. Teacher, Govt. Girls’ Higher Secondary School, Jowai, Babu Ribait Oo Pde, Asst. Teacher, Tep Kyndait Govt. U.P School, Tuber Kmaishnong, Golak Chandra Medhi, Asst. Lecturer, Jirang Govt. Higher Secondary School, New Jirang, Babansing Ch. Sangma, Head Teacher, Rongreng Baiza Govt. L.P School, Wilton Marak, Headmaster, Daram Govt. U.P School, Frederick R. Sangma, Headmaster, Dobasipara U.P School, Manoj Kumar Prasad, Asst. Teacher, Montfort Centre for Education(Sec), Mirabella G. Sangma, Head Teacher-Cum Secretary, Chengkompara Nokat Govt. L.P School bad u Nozmul Arefin, Vice Principal, Baghmara Govt. Higher Secondary School.
Nalor ka State Award, la sam ruh ïa ka District Award sha ki 36 ngut ki nonghikai ha kylleng ka jylla. Na East Khasi Hills ïa ka District Award la ïoh da i Dr. Careen E.G Marbaniang, Assistant Teacher, Mawkhar Christian HS School, Shillong na ka thup Secondary Section, Babu Wallamkupar Lynrah, Assistant Teacher, Mawsiatkhnam Prebyterian U.P School (SSA) na bynta ka Upper Primary Section bad Kong Dafrit Nongkynrih, Assistant Teacher, Tynring Govt. L.P School, Tynring na bynta ka Lower Primary Section.
Ka la don ruh ka jingsam ïa ki khusnam ba kyrpang ne ka Special Award 2023 sha i Berrilang Nongrum, Special Educator, Mary Rice Centre for Special Education, Laitumkhrah, Shillong. Nangta sha u Dilip Kumar Mangar, St. Anthony’s HS School, Shillong bad ruh sha i Miniefer Syiemlieh, KJP Girls’ HS School, Shillong ba ïoh pdiang ïa ka ka khusnam Best Scoutmaster and Guide Captain 2023.