Kthang mynsiem ki nongrep ha ka thaiñ Rangblang-Sohsynïang ba lynshop u phria

Mawkyrwat, ‘Naiwieng 08: Ki paidbah nongrep ha ka thaiñ Rangblang-Sohsynïang, South West Khasi Hills District ki la don hapdeng jong ka jingnoh mynsiem namar ka jingwan lynshop kynsan jong u phria ha kaba u kba uba la ieh ula hap lut sha madan.
Halor katei ka jingjia katkum ka jingïathuh jong ki nongrep na katei ka thaiñ Rangblang-Sohsynïang ki la ong ba ka jingwan kynsan jong u slap ryngkat u phria ka dei ha ka janmiet jong ka 6 tarik u Naiwieng, 2024 ha ka por 4:30 ei ei.
Kumta, na ka liang ki nongrep ki la pynpaw ka jingdiaw mynsiem namar ki la khmih lynti ba na ka jingtrei shitom jong ki kin sa ïoh ban kheit ïa u soh uba thiang hynrei phewse kita ki jingpyrkhat jong ki ka la long mar khongpong namar na ka jingwan lynshop kynsan kynsan jong u phria ka la pynlong ïa u kpa uba la ieh ba un hap lut sha madan. “Na ka jingkhmih lynti jong ki ban ïoh lum kham bun kumba ki angnud pynban ka la long mar khongpong”, paw ki nongrep.
Haba ïoh ban ïa kren bad kawei ka longkmie, ka la ïathuh ba ha u snem ba la dep ha shwa ka aiïom kam shym la don kum kane ka jingjia ba wan lynshop kynsan ki bor jong ka mariang bad ka la ïoh ban lum kham bun u kba hynrei mynta pat lah ban ong ba kam long shuh kumba la angnud bad ki jingtrei shitom baroh ki la pulom lut tang ha ki kyndiat minit jong ka jingwan jong u phria.
Namarkata, na ka liang ki nongrep na ka thaiñ Rangblang-Sohsynïang ki la buh jingkyrpad ïa ki bor ba dei peit ïa ka kam rep kam riang jong ka sorkar ba kan thaw lem ki lad lynti ban ïarap lem khnang ba kan nym ktah ïa ki jingtrei shitom baroh shi snem jong ki paidbah nongrep.