New Delhi, Lber 17: Kane ka long ka jingïakren u myntri rangbah duh jong ka Ri India u Narendra Modi bad u U Lex Fridman u la shah jingit 45 kynta na ka bynta ka jingïakren bad u Modi; U Myntri Rangbah duh Modi u la ïathuh ïa ka jingshem jong u ha kaba ïadei bad ka jingshah jingit.
U Lex Fridman, u la pynpaw ba u la shah jingit haduh 45 kynta, da kaba dih tang da ka um, kum ka jingburom ïa ka jingïakren jong u bad u myntri rangbah duh jong ka ri, u Narendra Modi. U Modi u la ïasam ruh ïa ka jingshem jong u halor ka jingleh niam, da kaba pynksan ïa ki jingmyntoi jong ka ha kaba pynjanai ïa ki jingsngew, pynbha ïa ka jingshai jingmut jingpyrkhat, bad pynrung ïa ka jinglong ryntih.
U la batai ba ka jinglehniam ka dei ka rukom stad saïan ym kaba shu kiar ïa ka bam bad ka don ka jingïadei kaba janbha bad ki rukom leh tynrai bad ki rukom Ayurveda. U Modi u la kdew ba u dih um bha shwa ban lehniam ban ïarap ha ka jingpynkhuid ïa ka met. U la kdew ruh ban ïa kaba suki ha ka kam, na ka jingshakri khlem da pyrkhat ïalade hynrei kaba phai sha kiwei pat. U Modi u la ïathuh ïa kawei ka khana na ka jingim jong u Swami Vivekananda ha kaba u leit bad kylli ïa u Sri Ramakrishna Paramahamsa ji ba ka kmie jong u ka pang bad u donkam jingïarap.
Ha kane u Paramahamsa ji u la ai jingmut ïa u ban leit sha ka Devi Kali bad ban pan jingïarap. Kane ka jingjia ka la pynlong ïa u Vivekananda ji ban sngewthuh ba kumno un pan eiei na ka jinglong blei kaba la dep ai lut ïa ka pyrthei, da kaba sngewthuh ba ka jingshakri ïa ka jinglong briew ka long ka rukom aiti kaba ha khlieh duh sha ka jinglong blei.
U Modi u kren shaphang ka jingïadei kaba jan jong u bad u Swami Atmasthananda ji. U Modi, u la pynkynmaw ïa ka por ba u don ha Ramakrishna Paramahamsa Ashram, ha kaba u la ïakynduh bad ki riewkhuid bad u la ïoh ïa ka jingieid kaba khraw na ki.
U la ïoh ïa ka jingïadei kaba jan bad u Swami Atmasthananda, uba la long ka bor kaba khraw ha ka jingim jong u. U Swami Atmasthananda u la ai jingmut ïa u ba ka jingthmu bashisha jong u ka long ban shakri ïa ki briew bad ban trei na ka bynta ka bha ka miat jong ka imlang sahlang.
Ka jingïadei jong u Myntri Rangbah duh Modi bad ka RSS, U Myntri Rangbahduh ka ri u Narendra Modi u la kren shaphang ka jingïadei kaba jan jong u bad kane ka seng, da kaba khot ïa ka kum ka Saubhagya (ka kabu) jong u ban long shi bynta jong kane ka kam kaba ïaineh.
U la ong ba u sngew ba u long uba la shah kyrkhu ban ïoh ïa ka jingthmu jong ka jingim jong u bad ki jinglong ba kordor jong ka jingshakri khlem da pyrkhat ïalade na ka RSS. U la ïaroh ïa ka bynta ba ka RSS ka leh ha kum kane ka jingheh ha ka pyrthei. U Myntri Rangbahduh u la pynpaw kumno ka RSS ka ai jingshakri ha ka pule puthi bad ka koit ka khiah ha ka rukom kaba heh ha kylleng ka ri.
U la kdew ïa ka jingïapher hapdeng ki seng leftist bad ka seng RSS. “Ki seng treikam leftist ki ong, ‘Ki nongtrei jong ka pyrthei, to ïatylli,’ hynrei ka seng RSS ka ong ‘Ki nongtrei, to ïatylli na ka bynta ka pyrthei.’ Kane ka pyni kumno ka RSS ka pynrung ïa ki jinglong jong ka ha ka rukom treikam jong ka.”
U Modi u la ïathuh shaphang ka jingïadei paralok jong u bad u Donald Trump, U Modi, u la ïaroh ïa u Donald Trump, halor ka jingshemphang jong u, ha ka por jong ka jingïalang Howdy Modi, ha kaba u la sngap bha ïa ka jingkren baroh kawei bad, wat hapdeng ki kyndon kiba ïadei bad ka jingshngaiñ, u la ïasnohkti lang bad u bad ïaid kylleng ka madan ban ai khublei ïa ki nongpeitkai.
U la sngewnguh ruh ïa ka jingshaniah kaba u Trump u don ha u. Haba kren halor ka jingïadei kaba bha hapdeng jong u bad u Trump, u Modi u la pynpaw ba ka rukom treikam jong u Trump ka America First ka ïahap bad ka jingmut jingpyrkhat jong u kaba long Nation First bad ka Bharat First, kaba kyntiew ïa ka jingïatreilang kaba skhem hapdeng kine ki arngut ki nongïalam.
Jubab u Modi ïa u Donald Trump uba khot ïa u, u nongïasaid uba tbit, u Modi u la pynpaw ba ka dei ka jinglong ba khraw jong u Trump ban khot ïa u, u nongïasaid uba tbit bad ban ai khublei ïa u ha ki rynsan bapher bapher. Na ka bynta u Trump, ka dei ka America nyngkong, bad na ka bynta u Modi, ka dei beit ka Bharat nyngkong.
U Modi u la ong ba ha baroh ki rynsan u ïeng skhem na ka bynta ka ka jingmyntoi jong ka India ha khlieh duh, khlem da thmu ban pynmynsaw ïa kiwei pat. U Modi u la ong ba da kaba buh hakhmat eh ïa ki jingmyntoi jong ka jaitbynriew u shu pyndep ïa ka jingkhmih lynti jong ki 140 klur ngut ki nong India kiba la aiti ïa kane ka jingkitkhlieh ha u.
U Modi u kynmaw ïa ka jingïakynduh jong u bad ka kynhun jong u Trump, U Modi u la kdew ba u Trump u dei uba pynleit jingmut bha ha ka samoi treikam jong u kaba mynta bad u la tei ïa ka kynhun kaba khlaiñ kaba u la ïoh ruh ïa ka lad ban ïakynduh.
Ha ka jingkren shaphang ka jingïadei kaba la slem jong u bad u Elon Musk naduh ba u long Myntri Rangbah ka Jylla, u Modi u la batai ïa ka jingïakynduh jong ki dang shen kum ka jingïakynduh kaba sngewtynnad bad kaba sngew jan, ha kaba la ïakren halor ka jingsngew shitrhem jong u Musk shaphang ka DOGE.
U Modi u pynpaw kumno ka jinglong jong ka DOGE ka la ïahap bad ka jingpynïaid kam hapoh ka jingsynshar jong u, haba kren shaphang ki jingpynkylla ba kongsan ha ka rukom synshar, u Modi u la ong ba hadien ba u la shimti ïa ka kam, ka sorkar jong u ka la ithuh bad weng noh ïa ki 10 klur ngut ki nongïoh jingmyntoi thok na ki skhim ai jingïarap.
La leh ïa kane da kaba pynthikna ba ki jingmyntoi kin poi sha ki briew kiba dei lyngba ka Direct Benefit Transfer (DBT), kaba la pynduna ïa ka jingsepei pisa kaba T. 3 lak klur. Nalor kata, ka jingsynshar jong u ka la pynduh noh ïa ki 1,500 tylli ki aiñ kiba la rim bad palat 45000 tylli ki kam ba hap ban pyndep ban pynbeit ïa ka jingsynshar.
Pynshai u Modi balei ka pyrthei ka sngap ïa ka ri India, u Modi u la pynskhem ba ka India, ka ri jong u Buddha bad u Gandhi, ka ïasaid na ka bynta ka jingsuk ha ki jingïakynad. U la ban jur ba ka pyrthei ka sngap ïa ka India namar ba ka ïeng na ka bynta ka jingïatylli.
Haba kren shaphang ka jingïadei kaba bha jong u bad baroh arngut u Putin bad u Zelenskyy, u la pynpaw ba u lah ban kyntu ïa ka Russia ba ka thma kam dei ka jingpynbeit katba u pynkynmaw ïa ka Ukraine ba ki madan thma kim wanrah ïa ki jingpynbeit ba shisha. U Modi u la pynshai ba ka India kam dei kaba ym ïashah ïano ïano hynrei ka ïeng skhem na ka bynta ka jingsuk.
Ka jingai jingmut jong u Modi sha ka Pyrthei; Iehnoh ïa ka jingïaleh bad pdiang ïa ka jingïatreilang, ha ka podcast bad u Lex Fridman, u Modi u la ong ba hadien ka COVID-19, ka long kumba ka pyrthei kan sa ïatylli, hynrei ha ka jaka kata, ka la nang ïapra, ha kaba ki jingïakynad kiba bun jait ki la mih ha ka pyrthei baroh kawei.
U Modi u la ong ba ki kynhun jong ki ri ki la kylla long ki bym don jingmut shuh, bad ki seng kum ka UN kim lah ban pyndep ïa ka jingthmu jong ki namar ba kim shym la ïaid lyngba ïa ki jingpynkylla kiba donkam. Ka pyrthei ka dei ban kynriah noh na ka jingïaleh bad pdiang ïa ka jingïatreilang. U la pynpaw biang ba ka roi ka par kan wan lyngba ka jingpynroi ym lyngba ka jingpynïar ïa ki ri.
Kren u Modi shaphang ki jingkulmar ha Godhra ha u snem 2002, u Modi u la ong ba la pynsaphriang ïa ka khana thok ha kaba ïadei bad ka mukotduma Godhra. Shwa u snem 2002, ka Gujarat ka la sakhi palat 250 tylli ki jingkulmar, bad ki jingïakynad hapdeng ki jaitbynriew ki ju jia man ka por.
Kumjuh ruh u la ïathuh kumno ka pyrthei ka dang sakhi ïa ka jingkiew jong ki kam lehnoh bad ki kam thombor ha kito ki por. Hynrei naduh u snem 2002, ym pat don wat tang kawei ruh ka jingkulmar kaba kum kane ha ka jylla Gujarat.
U Modi u la ban jur ba ka sorkar jong u kam ju ïashim bynta ha ka kam saiñ hima sima da kaba leh shiliang ïano ïano hynrei ka bud ïa ka nongrim kaba ong “Sabka Saath, Sabka Vikas, Sabka Vishwas, Sabka Prayas.” U la pynpaw ruh ïa ka jingshisha ba kumno ki briew ki la pyrshang ban pynjah burom ïa u hadien ki jingkulmar hynrei khatduh ka hok ka la jop bad ki iingbishar ki la pyllait ïa u na ki jingkynnoh ha kane ka jingjia.
Haba kylli shaphang ka jingsngew kynjah, u Modi u jubab ba um ju long marwei, U Modi u la ong, “Ngam ju sngew kynjah. Nga ngeit ha ka jingmut 1+1-uwei u dei u Modi, bad uwei pat u dei uba kynja Blei. Ngam ju sngew marwei shisha namar ba U Blei u don ryngkat bad nga man ka por.” U Modi u la bynrap ba na ka bynta jong u, ‘Jan Seva Hi Prabhu Seva’. U don ka jingkyrshan jong ki blei bad 140 klur ki nong India.
U Modi u kren shaphang kumno ka jingïohi jngai jong u Mahatma Gandhi ïa ka Jan Andolan ka ai mynsiem ïa man ka jingthmu jong u, u Modi u la kren shaphang ka jinglah jong u Mahatma Gandhi ban pynkylla ïa ka jingïaleh laitluid jong ka ri India sha ka Jan Andolan da kaba ithuh ïa ka bor jong ka Jan Shakti.
U la ong ba ha la ka jong ka rukom treikam, u ju ïaleh ban pynïasoh katba lah ïa kiba bun ki briew ha man la ki jingthmu, da kaba pynkylla ïa ka sha ka jingïakhih paidbah ryngkat bad ka Jan Bhagidari.
U Modi u la ban jur ba ka bor jong ka imlang sahlang ka long kaba khlem pud. U Modi u la ong ba u Mahatma Gandhi u dei u nongïalam uba khraw tam ym tang jong ka spah snem kaba 20 hynrei wat jong ka spah snem kaba 21 bad ki spah snem ban wan ruh kumjuh.
U PM Modi u batai ïa ka jingshem nyngkong jong u ha kaba ïadei bad ka jingïadei bad kiwei kiwei ki ri ha ka por ba u long Myntri Rangbah duh, u Modi u la pynpaw ba ka bor kaba khraw tam jong u ka wan na ki 140 klur ngut ki briew jong ka ri India, kiba ïeng kum ka bor ba wanrah ïa ka jingkiew kyrdan ha ka pyrthei.
Haba pynkynmaw ïa ki sngi ba nyngkong jong u ha ka kam, u Modi u la ong ba ki briew ki ju artatien ïa u ba kumno u briew uba la pynïaid tang ïa kawei ka jylla u lah ban pynïaid ïa ki kam bar ri jong ka India kum u Myntri Rangbah duh. Ha kane, ka jubab jong u ka long kaba skhem bad kaba khlem jingartatien: “Ka India kan ym nguh ne byrngem ïa kiwei pat. Ngin ïakynduh bad ka pyrthei da ka jingshaniah, da kaba peit markhmat.”
U Modi u la ban biang ba ka rukom treikam jong ka India ha ka pyrthei ka dei kaba la ïalam da ka burom, ka jingburom ïalade bad ka jingburom markylliang. U la pynpaw ba hapdeng jong kane ka don ka saiñ pyrkhat hyndai jong ka ri India jong ka Vasudhaiva Kutumbakam-ka jingngeit ba ka pyrthei ka long kawei ka longïing bad ba ka jingaiti jong ngi ka long ka jingbha jingmiat jong ka jinglong briew baroh kawei.
U Modi u kren shaphang ka kam saiñ pyrthei kaba khlem shah rem bad ka jingjop jong ka BJP, u Modi u la ong ba um pynïaid ïa ka jingsynshar kaba pynshong nongrim ha ka elekshon hynrei u pynïaid ïa ka jingsynshar kaba pynshong nongrim ha ki briew. U la bynrap ba ka sorkar jong u ka bud ïa ka polisi jong ka jingpyndap-ha kaba ki jingmyntoi ki poi sha baroh khlem da leh shiliang khmat.
Haba kren shaphang ka jingjop jong ka BJP, u la ai khublei ïa ki million ngut ki nongtrei jong ka seng kiba trei khlem shongthait bad khlem da pyrkhat ïalade, kiba aiti lut shisha na ka bynta ka roi ka par jong ka ri. U la ong ba u sngew sarong ban long u dkhot jong ka seng saiñ pyrthei kaba heh tam ha ka pyrthei kaba pynsaphriang ïa ka jingkongsan jong ka jingai sha kiwei pat.
Ka jingai jingmut ba tyngeh jong u Modi ïa ka Pakistan, u Modi, da ka sur kaba skhem, u la kren shaphang ka bynta ba la slem jong ka Pakistan ha ka jingpynroi ïa ki kam lehnoh, da kaba pynksan ba ka pyrthei kam don shuh ha ka jingartatien shaphang shano ki tynrai jong ka kam lehnoh ki don.
U Modi u la pynpaw da ka jingsngewkhia kaba jur ba man ka por, ka Pakistan ka la kylla long ka jaka pdeng jong ka jingleh donbor, kaba la wanrah ïa ka jingjynjar kaba khraw ym tang ïa ka India hynrei ïa ka pyrthei baroh kawei. Da kaba pynpaw ïa ka jingsngewsih, u Modi u la pynpaw ïa ki jingpyrshang ba bun bad ba shisha jong ka India ban wanrah ïa ka jingsuk.
Naduh ka jingleit jong u sha Lahore haduh ka jingkhot ia ka Pakistan sha ka jingbam smai jong u, man la ka jingpyrshang ban pynïasuk la ïakynduh da ka jingshun. U Modi u la kynthoh ba ki paidbah ka Pakistan ki dei hok ban ïoh ïa ka lawei kaba lait na ka jingshah thombor bad jingtieng bad u la kitbok kitrwiang ba ka Pakistan kan ïoh jinghikai na ki jingbakla jong ka bad kan jied ïa ka lynti kaba dei.
U Modi u don ïa ka jubab kaba kyrpang ha kaba jied mano ba kham tbit napdeng ki kynhun kriket jong ka ri India bad Pakistan. Haba kylli hato ka India ne ka Pakistan ka don ïa ka kynhun ïalehkai kriket kaba kham khlain, u Modi u la jubab ba um dei u riew shemphang ban bishar hynrei u la ai jingmut ba ka jingmih na ka jingïalehkai ba dang shen hapdeng kine ki ar tylli ki kynhun ka lah ban ai ïa ka jubab, (katba u kdew ba ka India ka la pynliem ïa ka Pakistan ha ka ICC Champions trophy).
U Modi u jied ïa u Maradona kum u nongïalehkai phutbol ba ieid tam, u ïaroh ïa ka ‘Mini Brazil’ jong ka India, U Myntri Rangbahduh ka ri, u Narendra Modi, da ka jingsngewtynnad bad jingkynmaw, u la jer kyrteng ïa u Diego Maradona kum u nongïalehkai phutbol ba u ieid eh, da kaba pynkynmaw ïa ka jingtbit bym lah ban ïanujor jong une u rangbah, ka jingshitrhem kaba aibor, bad ka jingktah kaba jur ïa ka jingïalehkai.
Haba kren shaphang kawei ka jingjia kaba pynsngew um mynsiem kyrpang, u Myntri Rangbahduh u la kren shaphang ka jingleit jong u sha Shahdol ha Madhya Pradesh, ha kaba u la sakhi ïa ka jingieit ba phylla ïa ka phutbol hapdeng ki riewlum. U la batai kumno ki nongshong shnong ki ju khot sngew sarong ïa ka thaiñ jong ki kum ka ‘Mini Brazil’-ka dak jong ki tynrai ba jylliew jong ka jingïalehkai ha ka kolshor jong ki.
U Modi u ong ba ka spah snem kaba 21 ka dei ka spah snem jong ka Asia, U Narendra Modi, myntri rangbah duh, u la pynpaw ïa ka jingïadei kaba jylliew jong ka kolshor hapdeng ka India bad ka China, da kaba kam ba ki jingïapher ki don, kumba long hapoh kawei ka longïing. Hynrei u Modi u la ban jur ba la pyrshang ban pynthikna ba kine ki jingïapher kim dei ban nang kiew sha ki jingïakynad.
U Modi u la ong ba ka jingïakren ka dang long ka lad ba kongsan ha kaba ïadei bad ka jingïadei hapdeng ki ar tylli ki ri. U Modi u la kdew ruh ba ki jinglong jingman ha khappud ki la long kiba thikna.
U Myntri Rangbahduh u la ong shuh shuh ba watla ka jingïakhun hapdeng ki ri ka long kaba ju don, hynrei dei ban kiar na ka jingïakynad khnang ban pynneh ïa ka jingsuk bad ka jingkiew shaphrang.
U la ong ba ka spah snem kaba 21 ka dei ka spah snem jong ka Asia bad ka jingïadei kaba bha hapdeng ka India bad ka China kam dei tang kaba myntoi hynrei ka long kaba kongsan na ka bynta ka shongsuk shongsaiñ bad ka roi ka par ha ka pyrthei.
Ka jubab jong u Modi ïa kito kiba kren pyrshah ïa ka jingmyntoi jong ka Ri, u Myntri Rangbahduh ka ri u Narendra Modi u la pynpaw ïa ka jingsngewkhia halor ka jinghiar jong ki jingïakren paidbah, da kaba ong ba ïa ka jingïatai kaba don jingmut la bujli noh da ki jingkynnoh ba khlem nongrim ba la leh khlem ka jingwad bniah ne ki jingshisha.
U Modi u la ban jur ba ka jingkynthoh, haba la kyrshan da ka jingmut bad ki sakhi, ka don ka bynta kaba kongsan ha kaba thaw ïa ki polisi bad pynkhlaiñ ïa ka synshar paidbah. Hynrei u la ong ba ha ka jaka ban ïashim bynta ha ka jingbishar bniah, bun ki pyndonkam da ki lad lyngkot da kaba kynnoh lypa khlem kano kano ka jingpyrshang ban pynshisha ïa ka jingshisha.
U Modi u la ban jur ba ka jingkynthoh kaba la pynbeit bha bad kaba kyrpang ka don ka bynta kaba kongsan ha kaba thaw ïa ki polisi kiba treikam. Hynrei u la kdew ba don ki riew shimet kiba treikam da ki jingthmu ba pher bad ka jingthmu kaba bakla, da kaba pyndonkam ïa ki jingtip kiba bakla kum ka atiar ban ïalam bakla ïa ki briew.
U Modi u batai kumno ki jingpyrshang jong ka pyrthei ban kyntiew ïa ka AI kim long kiba pura khlem ka India, U Modi u la ban jur ba wat la ka pyrthei ka kiew katno katno ruh ha ka AI, hynrei kan ym pat biang khlem ka India. U la pynpaw ba ka AI ka dei shaphang ka jingïatreilang, bad ka India ka ai ka jingnoh synniang kaba khraw ha ka jingkyntiew jong ka.
Ka India kam dei tang ba ka noh synniang sha ka jingpynmih ïa ka AI hynrei ka thaw ruh ïa ki lad AI kiba ïadei bad ki jingpyndonkam ba kyrpang. U la ong ba ka jingtbit jong ka India ban pynbeit ïa ki jingeh bad ka jinglah ban pyrkhat bniah ka long kaba lah ban ïaid bha ha ka pyrthei, kaba pynlong ïa ka ri kum ka bynta kaba kongsan ha ka jingkylla ha ka AI.
U Modi u jubab ïa ka jingkylli shaphang ka Artificial Intelligence pyrshah ïa ka jingstad briew, u Modi u la pynpaw ba ha ka histori baroh kawei, la ju pyni ïa ka teknoloji kum ka jingeh kaba khraw tam jong ka jinglong briew. Hynrei man la ka por, ka teknoloji bad ka jinglong briew ki la nang kiew, ha kaba ki briew ki ju don shi sienjam hakhmat. U la ban jur ba watla ka AI ka long kaba donbor, hynrei ka lah ban ym ïahap satia bad ka jingjylliew jong ka jingmut jingpyrkhat jong u briew.
U Modi u kren shaphang ka jingaiti lut jong u sha ka kam paidbah, U Myntri Rangbahduh Narendra Modi u la kren shaphang ka jingsngew kitkhlieh kaba jylliew jong u ïa ki paidbah, da kaba pynksan ba ka jingshaniah paidbah ka la long ka bor kaba khraw tam jong u ha baroh kawei ka jingïaid lynti jong u ha ka saiñ hima sima. U Modi u la ong ba naduh ka sngi ba u rung ha ka kam saiñ pyrthei, u la kheiñ ïa ki paidbah kum ki kynja blei bad u la trei da ka jingaiti lut ban pynthikna ba ka jingngeit jong ki ha u kan ym duh satia.
Da kaba batai ha ka rukom kaba phylla, u la ïanujor ïa ka jingshakri jong u bad ka jingshakri jong u nongmane uba pyndep ïa ki kam kyntang, da kaba ong ba kumba u lyngdoh u mane ïa ka jinglong blei da ka jingaiti kaba khlem artatien, u sah hapdeng ki briew, u shakri ïa ki da kajuh ka jinglong ba shisha bad ba aiti lut.
U Modi u jubab haba la khot ïa u kum u nongïalam ba donbor tam ha ka pyrthei, U Narendra Modi, myntri rangbah duh, ula ban biang ïa ka jingshimkhia jong u, ha kaba u ïohi ïalade, kum u ‘Pradhan Sevak’. U Modi u la ban jur ba ka bor kam ju long ka jingthmu jong u, bad um ju pynleit jingmut ha ki kynjnit kynjnat jong ka kam saiñ pyrthei. Ha ka jaka kata, ka jingpyrkhat jong u ka long beit tang ha ki kam kiba don jingmut kiba ai jingmyntoi beit beit ïa ki paidbah.
Da ka jingthmu kaba shai na ka bynta ka jingsynshar, u Myntri Rangbahduh u la pynpaw ba ka thong jong u ka long ban long uba kyrshan ïa ka kam, ym uba donbor. U la ban jur ba ka jinglong nongïalam kaba shisha kam dei shaphang ka bor hynrei ka dei shaphang ka jingaiti lut ha ka jingshakri, ban pynthikna ba man la ka jingleh kan noh synniang sha ka jingkiew jong ka ri bad ka jingbha jingmiat jong ki nongshong shnong jong ka.
U Modi u batai shaphang ki lai tylli ki kyndon na ka bynta ka jingbishar bniah ïalade, U Modi u la batai shaphang ki lai tylli ki kyndon ha kaba u bishar bniah ïalade. Nyngkong eh, un ym kynran dien satia na kaba leh ïa ki kam kiba eh. Kaba ar, un ym leh ei ei da ka jingthmu kaba bakla.
U lah ban bakla, hynrei ym ju bakla da ka jingthmu kaba bakla. Bad kaba lai, un ym leh ei ei tang na ka bynta lade. U la bynrap ba ka jingsngewhun kaba shisha ka wan na kaei kaba phi ai sha ka imlang sahlang ban ïa kaei kaba phi ïoh bad pynurlong.
Hato u Myntri Rangbah u sngew jynjar? U Myntri Rangbah duh u ïathuh ïa ka jingïoh mynsiem na ka bynta ka jingpyrshang ba khlem sangeh jong u, u Myntri Rangbah duh ka ri u Narendra Modi u la ban jur ba ïa ka jinglong nongïalam ba shisha la tei halor ka jingtrei shitom bad ka jingkitkhlieh.
