Shillong, Kyllalyngkot 15: U Myntri Rangbah ka Jylla Meghalaya – u Conrad K. Sangma ha ka sngi Balang u la pynlong ïa ka jingïalang bad ka President jong ka Indian Olympic Association (IOA) ka P. T Usha lyngba ka video conference ha ka jingïadonlang ki dkhot nongkitkam ka Meghalaya Olympic Association (MOA).
Ha kane ka jingïalang na ka liang jong u Myntri Rangbah ka Jylla u la pynsngew ha u President ka IOA ïa ka jinglong ba la kloi bad kaba la pynkhreh jong ka jylla ban pdiang ïa ka National Games kaba 39 ha u snem 2027.
U myntri rangbah u la pyntip ïa kane ha kine ki saw snem ba la dep, ba ka Jylla ka la bei tyngka ha ka ban thaw ïa ki jingtei ha kaba ïadei bad ka Sports, kynthup ïa ka jingpynbha ïa ka madan JN Sports Complex ha Polo, Shillong, nangta ka Wahijher Stadium ha Jaintia Hills bad ka P.A. Sangma Integrated Sports Complex kaba ha Tura bad kiwei kiwei ki jaka ïalehkai bapher bapher.
U la pyntip ruh ba ka nongbah Shillong ka la seisoh ban pynlong ïa kiba bun ki lympung ïalehkai kiba kynthup ïa ka North East Games ha u snem 2022, South Asian Games ha u snem 2016 bad ha kine ki lai snem ba ladep ka la ïoh ban pynlong barabor ïa ka Meghalaya Games.
U Dr. D. Vijay Kumar, Commissioner jong ka tnad Sports & Youth Affairs, u la pyntip ba ka jylla ka la soi ïa ka jingïateh bad ka IOA ha u snem 2018, ha kaba ka nongbah Shillong kan long ka nongbah ka ban sa pdiang, bad ar tylli kiwei pat ki nongbah, ka Tura bad Jowai kin pdiang ïa kiwei pat ki jingïalehkai bapher bapher na ka bynta ka National Games.
Ha kaba ïadei bad kane, na ka liang jong ka President ka IOA ka la jubab ba ka Association ka dang pyrkhat ban ailad ïa ka jylla Meghalaya ban pynlong ïa kane ka lympung.
Mynta u snem ka National Games kan long ha Uttarakhand, bad ha u snem 2026, kan nym don naba ka India kan pdiang ban pynlong ïa ka Asian Games ha u snem ban wan.
