Ka jingkren ki nongïalam ka sorkar MDA khamtam ka party ba ïalam ïa kane ka Sorkar ha Meghalaya ka la pynlyngngoh bad pyndukha mynsiem lut ym tang ïa ki nongïalam sengbhalang hynrei ïa ki paidbah nongshong shnong hi ka ri Khasi-Jaiñtia hi baroh kawei. Ka jingkren jem daw na ki nongbat ïa u lakam synshar jong ka Sorkar Meghalaya ka la mih ha ka por ba dang rhem bha ka jingïakren bad jingïakynad pud hapdeng ka Sorkar Assam bad Meghalaya.
Ban shu leit ai ei bad leit pyndem tdong ïa ki shnong kiba don ha Block II haba ki shnong baroh la shong la sah hi da ki para Khasi-Jaiñtia ka dei ka jingai ei ka bym lah ban pdiang bad ka jingkren khawpud lypa da ki nongïalam bad ki nongsynshar na ka liang ka Sorkar Meghalaya jong ngi.
Ka jingkren bad pynpaw pyrthei jong uwei na ki nongïalam rangbah kane ka sorkar Meghalaya ba ki shnong ha Block II ki dei hapoh ka pud ka sam jong ka jylla Assam ka la ai mynsiem bad pynkmen shikatdei eh ïa ki nong Assam. Katba kata ka Committee pynbeit pud ka dang ïaid shaid shaid, ka Meghalaya pat ka la buh jingeh lypa da lade ïalade. Kumno kata ka MoU ki la ïasoi ban shu ai sngewbha ïa ki shnong Khasi-Jaiñtia sha Assam? Kumno ki ïai kob shi ïai kob, hana,ba dei tang ma ki (MDA) kiba lah ban pynbeit ïa u pud u sam bad ka Assam hadien 50 snem ei ei mynta? La dei ban sngewlehrain ha ka jaka ban sngew sarong. Tharai, ka Sorkar Assam kan shah hi ban pynïoh biang sha Meghalaya haba la dep ai dak lypa ba ki hap sha Assam? Hato, dang don jingmut ban ïalum Committee khappud biang ban ïa pyrkhat haba ka kam ka long kaba lah ïap lypa? Hato, long hi ban shu ïa pyllut kai ïa ka por, ka bor bad ka pisa ban ïa khyllie biang ïa ka kam ba ladep ai lypa?
Kine kiei kiei baroh ki dei ka hok jong ki paidbah nongshong shnong nalor ki sengbhalang bapher bapher kiba don ka jingsngewkhia ïa ka ri bad ka jaitbynriew khamtam ïa u pud u sam ba la ïoh kynti da ki kni ki kpa bad ki longshwa manshwa jong ngi.
Ka jingbym ïoh ki nongïalam shnong na ka shnong Mukroh ban ïakynduh ïa u Myntri Rangbah ka Meghalaya dang shen ruh ka la pyni ka jingartatien ïa ka rukom pyrkhat kane ka Sorkar MDA hapoh ka jingïalam ka NPP ïa ka kam pynbeit khappud.
Haba bun ki nongshong shnong ki la kwah ban wan pynpaw hakhmat ka Sorkar ba kim pat don satia kata ka jingshong shngaiñ ha ki thain jong ki, ka Sorkar MDA pat ka leh kyllut bad kheiñ kai pynban kat ïa ka shongsuk shong shngaiñ jong ka Jylla ruh. Hato, kum kane ka Sorkar kaba kheiñ sting bad kiar rai maw raidieng ïa ka jingkwah ki paidbah ïa ka suk ka saiñ ka donhok seh ba kin bteng biang ïa ka Sorkar kumba ki la kob lypa ban synshar biang hadien ka Election 2023?
Hato, u paidbah u sngewdei ban ai biang ïa kum kine ki nongsynshar ba khein tangdep ïa ka angnud u paidbah? Kine ruh ki dei hi ki mat kiba donkam ba ki paidbah u dei hok ban tip khnang ba kin ïoh ban puson bha kaei kaba dei bad kaei kaba lait shwa ban poi ka Election 2023.
Hynrei,tang kawei kaba ngi ïohi ba,katba kane ka Sorkar ka la pheil lut nadong shadong, ki nongïalam paidbah (MLA/MDC) pat shaid shaid ki ïa rung sted da kaba kheiñ jingkheiñ lypa ba kane ka party kan don biang ha ka Sorkar hadien u 2023.
Ki la phoh sniew lypa ïa ka kam Minister ba heh ryngkat bad ki kam (portfolio) doh kshong ha ka Sorkar thymmai. Lada bakla ka jingkheiñ ïa ka jingphoh sniew jong ki, (kumba long ki nongthoh tim) bad lait pynban u number ba thoh, kin sa babe kylla tang mar ïadep ka Election 2023 bad kin sa ïa pynkylla baji biang ïa ka rukom pyrkhat politics jongki tdong-tdong, khlieh khlieh la kum ki lambit khlem nongrim.
