Shillong, Nohprah 19: U National General Secretary ka NPP u Bah Sniawbhalang Dhar ha ka sngi Palei u la pynpaw ïa ka jingsngewskhem bad kob ruh ba ka party khlem artatien kan ïoh ïa ka jingbun paid bad ban ïoh synshar bad thaw ruh marwei ïa ka executive committee (EC) ha baroh artylli ki ADC ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) ha kine ki elekshon ban sa long ha ka 21 tarik u bnai Kyllalyngkot u 2025.
U Bah Dhar u la ïathuh sha ki lad pathai khubor ba ka party ka la pynkhreh pura na ka bynta kine ki elekshon ha kaba shen ruh kan sa pynbna ïa ka thup kyrteng kaba arngut jong ki kyrtong ka seng ka ban long hashwa ka Christmas ne ha u snem thymmai.
U la ong ba ki kyrtong na ka bynta ki katto katne ki constituency yn dang hap ban pynkhreh ïa ka thup kyrteng ki kyrtong na ka daw ba ki don bun kiba pan tiket na ka party.
U Bah Dhar u la ïathuh lypa ba ka NPP kan lah ban thaw tang mawei ïa ka executive committee ha baroh artylli ki tribal council.
“Khlem jingartatien ngin sa lah ban thaw ïa ka EC dalade. Shu buh lada ngi duna ka jingdon ki MDC jong ngi, ngi pdiang sngewbha ïa kiwei pat ki political party ban ïasoh bad ngi,” u la ong.
Haba pynthikna ïa kane ka jingsngewskhem jong u, u Symbud Myntri Rangbah u la ong ba kane kan urlong naba ka NPP ka la trei bha ha ka jylla bad kumjuh ruh ha ki artylli ki district council. Haba kubur ba ki don ki jingïaleh ba la mad da ka district council, u Bah Dhar ha kawei ka liang u la ong ba ka sorkar ka la leh ïa kaba bha tam ban khmih ïa ki jingeh kaba kynthup ïa ka jingduna ka pisa khamtam eh ba la mad da ka JHADC.
U nongïalam ka NPP u la banjur da kaba ong ba um ïohi satia ba ka seng voice of the People’s Party (VPP) kaba don ha ka liang pyrshah ba kan long ka jingma namar ki briew jong kine ki artylli ki ADC ki la ïohi ba ki la don bun ki kam pynroi ba la leh da ka sorkar MDA hapoh ka jingïalam jong ka NPP.
“Namar kata kam don satia ka jingma namar ngi ïakhun hi da la ka jong ka bor bad ka jingkhlaiñ. Ha ki por ba don ki elekshon ngi long barabor kiba trei shitom,” u la pynpaw.
Haba jubab ïa kiba bun ki jingshah kynnoh pyrshah ïa ka sorkar u Bah Dhar u la ong, “Ka NPP ka dei u dieng uba don ki soh bad baroh baroh ki kwah ban kdew kti ïa ka. Ngi la leh ïa la ka jong ka bynta bad ka NPP ka la leh ïa kiba bun ki kam pynroi ha kane ka jylla.”
