Ko nong Shillong, kiar ban bret pathar iaki jaboh sha ki wah Umkhrah bad Umshyrpi, kyrpad ki paidbah

Nongpoh, Naitung 30: Ki longkmie naka shnong Mawlyndep ha Ri-Bhoi hapoh ka lama jong ka Kiew Shaphrang VO, haka jingïatreilang bad ka Meghalaya Basin Development Authority (MBDA), ka Dorbar shnong bad ka jingïashim bynta lang jong ki shnong bapher bapher kiba don ha rud ka pung Umiam, kila pynlong ïaka prokram ba kyrpang bala tip kum ka Clean Umiam Campaign ban pynneh pynsah ïaka jingitynnad ka pung Umiam kaba dei kawei naki jaka jngohkai ba pawnam haka jylla, ban pynkhuid ïa baroh ki sawdong sawkum jong katei ka pung kaba la dap bad satah tang da ki jaboh jabain ki plastik, bilor bad kiwei kiwei.
Ïa katei ka jingpynkhuid ïaka pung Umiam la sdang naduh ka 25 tarik mynta u bnai lyngba ka jingshimkhia jong ki longkmie ka shnong Mawlyndep, bala kyrshan lang ruh da ki samla pule jong ka UCC College, ka St. Anthonys’ College bad ïa katei ka jingpynkhuid la pynkut noh mynta ka sngi bala sakhi ïaka jing ishyrkhei jong ki jaboh bala ioh ban lum narud katei ka pung Umiam.
Ha katei ka sngi ka jingpynkut ïa katei ka Clean Umiam Campaign naka liang ki longkmie jong ka shnong Mawlyndep bad ki shnong ba marjan, ki samla pule jong ka UCC College bad St. Anthony’s College kila shim bynta ban lum ïaki jaboh jabaiñ kiba la rben harud ka pung Umiam kiba la tuid na sor Shillong sha katei ka pung ban pyn sniewdur iaka jingitynnad jong ka pung Umiam kaba dei ruh ka jakpoh jong kiba bun ki nong shong shnong sha katei ka thaiñ.
Haba kren sha ki lad pathai khubor naka liang u Bah Jinu Kharbuki Rangbah Shnong ka Mawlyndep bad ka kong Joybynta Syiemiong President ka Kiew Shaphrang Village Organisation ki la ong ba baroh ki jaboh jabaiñ kiba tuid sha katei ka pung Umiam ki dei kiba wan tuid naka Wah Umkhrah bad ka Wah Umshyrpi, bad kitei ki jaboh ki shu sahkut ha rud jong katei ka pung kaba wanrah ka jingijli wat ban peit watla ka dei ka jaka jngohkai pyrthei kaba itynnad kaba bun naki paidbah ka jylla bad wat shabar ka jylla ki ju sngewtynnad ban pynlut por sha kitei ki jaka naka jingitynnad ba ka jinglong jingman jong ka mariang bad ka jaka.
Kila pynpaw ruh ka jingsngewkhia kaba jur halor ka jingnang rben ki jaboh jabaiñ bad ki jakhlia kiba la pynsniew dur ïa ka wah Umïam na ka jingbret pathar jong ki paidbah nongleit nongwan bad khamtam ka jingbret pathar ïa ki jakhlia da ki nongshong shnong ka sor Shillong kiba la satah bad pynsniew dur ïa kane ka wah bad phah ruh ba khubor ba ki paidbah kiba shong ba sah ha sor Shillong ki dei ban shai ka jingmut jingpyrkhat ba kim dei ban shu bret madei iaki jaboh jabain sha katei wah kiba tuid bad lang pat sha katei ka pung ha kaba kila pynpaw ba bret Jaboh mano? Syrtok mano?
Lyngba katei ka sngi naka liang ki longkmie bad ki nongshong shnong kiba sah harud ka pung Umiam kila kyrpad ïaki paidbah khamtam kiba na sor Shillong ba kin kiar na kaba bret pathar iaki jaboh jabaiñ sha ki wah khnang ba katei ka jingangnud jong ka ka shnong Mawlyndep bad ki shnong ba marjan ban wanrah ïaka jingitynnad ïa katei ka wah bad ka khuid ka suba kan urlong kaba lah ruh ban khring iaki nongjngohkai pyrthei ka ban kyntiew ruh iaka ioh ka kot ki paidbah ha katei ka thaiñ.