Ko Jylla ki Lyoh! Ki policy aiu pha don ne ngin shu ïaid ruma sah ha ka jingsngew khlem ka jingshemphang?

Ha kine ki khyndiat por ka Jylla ki Lyoh ka shlei da ki jingïakhih paidbah ha madan bad surok. Naduh ki nonghikai SSA, kiba la pynlong jingïakhih haduh ar phew (20) sngi lynter ha Madan Malki, Shillong, haduh ki nongñiah kali toursit kiba la ïakhih jubor bad khang ïa ki kali tourist, kiba kit ïa ki nongjngoh kai, na shabar ka Jylla, kat haduh u pud ba ka la jan pynkylla lieng ïa kiwei pat ki nongtrei nongbylla bad ïa ki trai nongpynïaid ïa ki ïing shong basa ne Home Stay kiba don ha kylleng ki jaka bad kiba im ja na ka kam jngoh kai pyrthei. Kane ka pynpaw shai kdar ba don shibun ki thliew ki syar ha ka treikam bad ka synshar kiba lait ler bad kine ki la pynsyrtok ïa ka jingim jong ki nongshong shnong.
Na ka bynta ki nonghikai SSA, ka Sorkar kam dei shuh ban pynslem ban weng ïa ki jingeh kiba ki nonghikai ki ïashem mynta. ñiuma, ka pule puthi ka dei kawei ka tnat kaba la shah ïehnoh beiñ bad kaba la nang hiar arsut. Lait na ki jingeh ki khynnah skul bad ka jinghiar arsut ka jinghikai skul, kawei kaba ktah jur ïa ka pule puthi ka long ba ka bor Sorkar bad ki nongpynïaid skul kim lah ban siew ka bai nong ne tulop kaba biang briew ïa ki nonghikai khnang ba kin im, kin lah ban bsa ïa ki khun ki kti bad ban pyndap ïa ka ïing ka sem. Ka tnat peit skul jong ka Sorkar kam lah ruh ban pynbha ïa ki lad jinghikai ki ban ïarap bad pynkhreh ïa ki khynnah skul ban mih sha ka pyrthei ban ïakhun ha ki jylli jong ka khaïi-pateng, ka synshar khadar, ka art, ka sport bad kiwei de. Ka jingïapher ka jingïoh kamai ne tulop hapdeng ki para nonghikai kiba hikai ha kajuh ka skul bad halor ki juh ki kot, bad ïa ki juh ki khynnah skul ka jur bha. Kum ka nuksa, ha kawei ka skul don ka nonghikai kaba ïoh tulop kaba heh na ka Sorkar, kawei pat ka ïoh ka tulop kaba pdeng na ki grant ne jingkyrshan ka Sorkar, katba kawei pat ka ïoh tulop kaba poh dor namar ba la siew na ka pla ki trai bad nongpynïaid skul. Ki don sa kiwei pat ki nonghikai skul kiba hikai ha ki skul jong ki riewshimet kiba shah khñoit beiñ haban da biang. Hato kam la dei ka por ban pynbeit noh ïa kane? Ki nonghikai ne kino kino ki nongbylla, wat ki nongbylla ki barit kyrdan tam, kim dei ban ïoh duna ïa ka ar phew san hajar (25000) tyngka ka tulop shi bnai khnang ba kin im.
Ha kawei pat ka liang, lada don daw eiei ban kyrshan ïa ka jingïakhih ka kynhun ki nongñiah kali “tourist” ne ka All Khasi Meghalaya Tourist Taxi Association (AKMTTA), ka long beit thik halor ka nongrim ba ka “tourism industry” hapoh ka Jylla ki Lyoh ka dei ban kyntiew nyngkong eh ïa ki trai shnong. Toi, kane ka kynhun ki nongñiah kali “tourist” ka la leit sha ka miej jong ka jingïakren bad ki tip kham bha ma ki, kano ka policy ka ban kyrshan ïa ka kamai kajih jong ki bad ka ban ym ktah ïa kiwei ki nongbylla bad ïa ki trai ne nongpynïaid jong ki ïing shong basa kiba shaniah tylli tyllan ha ka jingwan ïuh kjat jong ki nongjngoh kai pyrthei. Ha kajuh ka por, ka jinglong tynrai jong ka “tourism industry” ka dei ka jait kam kaba thut shen, lada ngim nang ban burom ne pynïaid ïa ka. Lada ngi mutdur shisha ba ka “tourism industry” ka dei ka lad kamai ja kpoh ne ka lad aikam ïa ki samla ha ka Jylla ki Lyoh, ngin hap ban phikir bha namar ba ki nongwan jngoh pyrthei ki don tang kawei ka jinglong bad kata, ki kwah ïa ka suk, ka aram, ka jahthait bad ka sngewbha, kum ka shad ka mastieh, ki bam babang bad ki um bathiang. Ki kwah ruh ban leit tang sha ki jaka ba ki ïoh ban ïaid laitluid, ban rwai ban kyang laitluid, ban ym shah peit khmat, ban ym shah pyndik bad ban shong, ban ïeng ha ka jingsuk bad jingshngaiñ. Yn ym don ki nongjngoh pyrthei ki ban leit sha ki jaka ba ïaleh thma ne sha ki jaka ba kin shah shoh shah shah dat ne shah tuh, shah lute.
Ki nongñiah kali kamai, kum ki “toursit taxi”, ha ka Bri Hynñiewtrep ki dei kiba laitluid ne “independent” namar bun na ki, ki ñiah ïa ki kali lajong (ki long malik hi bad long dribar hi). Bad wat kito kiba ñiah ïa ki kali jong ki malik ruh ki laitluid, namar ba ki trai kali ki dei ki riewshimet, ym ki company, kiba pynïaid da ki hajar tylli ki kali kamai bad kiba khñoit beiñ ïa ki dribar kiba long tang ki nongbylla. Ka nongrim jong ka AKMTTA, kumba ki la pynshai paidbah ka long ban kyntiew ïa ki dribar trai ri (Khasi). Kumta, shu sngewkwah ban pashat jingmut sha ki bad kyrmen ba kin saiñdur bad pynkhlaiñ ïa ka nongrim treikam jong ki khnang ba kin lah shisha ban ïada ïa ka pateng ka ban wan, hadien ba ma ki kim ñiah kali shuh. Kaba ki dei ban pynkhreh lypa na ka bynta ki snem ki ban wan ka long ban ïada ïa ki nongñiah kali “tourist” trai muluk na ka shrip jong ka “Uberization”.
Ka jaidbynriew kaba rit paid kum ki Hynñiewtrep ka donkam ban pynkhlaiñ bad pynskhem ïa ki lad bad ki aiñ kiba ïada na ka jingshah bam shngaim ha kiwei pat ki kynhun jaitbynriew kiba heh paid. Hynrei ka ïap ka im jong ka jaitbynriew Hynñiewtrep, kam shong eh ha ka Reservation Policy ne RP lymne ka jingkyntiew ïa ka bhah thung kam. Ka RP ka lah ban kylla ne ka lah ban ym kylla, kam pher kata, namar dei tang ma ngi hi ki trai Jylla kiba ïohnong ne ïoh ja na ka. Kaba ngi donkam ban dawa tyngeh mynta ka long ban peit bniah biang (review) ïa ka Single Window Policy kaba la plie ïa ka khyrdop bah ban tei ïa ki phew tylli ki kharkhana dew bilat kaba la ktah bad pynjot ïa ka mariang.
Nalor nangta, kata ka jingsheptieng ba ki mynder ri ne ki nongwei na Ri Bangladesh ki lah ne kin sa tyllep ïa ngi, kam paw ba ka long shisha ïa mynta, namar ki dak jingkheiñ jong ki khanasamari ne census ki ïathuh da kumwei pat. Ka khanasamari kaba khatduh la pynlong ha ka snem 2011 bad katkum kane ka khanasamari ka long, ba ha East Khasi Hills District, ka District kaba don shibun bah kiwei pat ki kynhun jaitbynriew non-tribal ne ki “dkhar”, ka jingdon ki Schedule Tribe Khasi & Jaiñtia ka long phra phew na ka shi spah ne 80% na ka jingdon briew. Ka District kaba don bun tam ki Schedule Tribe ka dei ka West Khasi Hills bad ki don haduh 97%. Ka khanasamari jong ki nongtrei Sorkar Meghalaya jong ka snem 2022, ka kdew ba 60.86% na ki kam Sorkar la bat da ki Khasi, 30.61% la pyndap da ki Garo bad kiwei pat ki don kumne- 2.42% kiwei ki ST, 0.54% ki SC, 1.11% ki OBC bad 4.47% kiwei kiwei de. Nalor nangta kumba 90% ki shuki ha ka ïing Dorbar Thaw Aiñ jong ka Jylla la mar kyrpang na ka bynta ki trai ri. Kine ki dak jingkheiñ ki pynpaw ba ki trai ri ki bat lut ïa ki kam ki jam bad ïa ka synshar khadar. Mynta lei, ki samla Khasi (kynthei bad shynrang) ki trei minot ha ki kam lajong bad ki ïakhun ban ïeng ha la ki jong ki kjat bad kine ki la ïalam lynti ban kner sha ki kam khaïi-pateng bad shen kin sa noh ïa u synñiang bakhraw ha ka thiar jong ka ïoh ka kot kaba ngim pat ju ïohi koit mynshuwa, tang lada ngi ai ka jingkyrshan kaba tyngeh bad plie ka lad na ka bynta jong ki ha ka dur kaba shai, kaba beit, kaba khlem ka jingïashah liang bad kaba ai jingkheiñ. Haba ong kumne, kam mut ba ngim dei shuh ban sumar bad ïada ïa la ka jong ka jaitbynriew kaba rit paid bad ïa ka khyndew ka shyiap, kaba long ka kmie, kaba bsa bad ai jingim ïa ngi haduh kane ka pateng.
Kaba ngi dei ban dukha mynsiem ka long ba ïoh don ka daw ïing kaba lah ban bthei napoh rympei ha kano ma ka por ba ym poi pyrkhat. Ka jjngkylli kaba mih mynta ka long, da ka Economic Policy bad ka Environment Policy kiba kumno ngin saiñdur ïa ka Jylla bad ngin pyndonkam ïa ka spah ba ngi la ïoh pateng? Da ka Economic Policy bad Environment Policy kiba kumno ba ngin king ïa kane ka lieng jong ka Jylla ki Lyoh? Ki policy ki ban ïada bad kyntiew, ym ki ban pynjot ïa ka kmie, ka khyndew, ki policy ki ban ym pynkylla duk bad pynkylla phetwir ïa ki khun ka bri. Katba ngi dang ïakren kumne, ka jingshisha ka paw ba ka jingdon ki para doh para snam kiba la duh noh ïa ka khyndew bad ki jaka rep jong ki na ki daw kiba bun (ym dei ba ki shah knieh jubor ha ki mynder) ka la nangkiew bad ka jingwan phet shnong na nongkyndong sha sor Shillong ka la nang jur kat nang mih ki snem. Ka jingdon ki trai ri ki bym lah bor ban thied khyndew ban shna ïing shong, khamtam ha Shillong, ka la nang jur bad ka kharai kaba pynïakhlad ïa uba duk na uba riewspah ka la nang ïar.
Dang shen, ki dak ki shin jong ka jingïakynad hapoh rympei ki la paw pen ryngkew ha ki bynta jong ka Hima Sutnga hyndai ne Jaintia Hills, ha ka por ba don ka “public hearing” na ka bynta ka jingplie thymmai sa kawei pat ka kharkhana dew bilat bad kine kim long ki dak kiba bha. Ki jingthoh ha ki kynroh mynta ki la kren shai ba kaba kham sniew ka ap. Lah slem, ka la don ka jingñiewthala ïa ka Aiñ Khyndew kaba pynneh bad ïada ïa ka khyndew jong ngi ki trai ri bad mynta lah nang pynjemdaw shuh shuh da ki kti jong ngi hi bad ka Balang Presbyterian ha Lumshnong, East Jaiñia Hills, ka la lam khmat ïa kane da kaba ai wai ïa ka khyndew kaba heh kumba 25 hectar sha kawei ka kharkhana dew bilat na ka bynta san phew (50) snem ba kan pynheh ïa ka kam shna bad khaïi dew bilat. Kane ka jingleh, kam dei tang ka jingleh ñiew beiñ ïa ka Aiñ Khyndew, hynrei ka dei ruh ka jingplie ïa ka khyrdop kaba shyrkhei (floodgate) kaba ngin ym lah shuh ban set bad kan buh jingma ïa ka khyndew ka shyiap hapoh ka Bri Hynñiewtrep ha ki snem ban wan. Kaba pynshaïong ka long ba kumno ka Balang jong u Blei, kaba la pynkup ha ka ïa ka jinglong sordar ban pynneh bad ïada ïa ka jingthaw jingpynlong jong u Blei, ka shlan ban ai wai ïa ka khyndew sha ka kharkhana dewbilat. Kane ka la dei ka jingleh-ibeiñ ïa ki jingthaw ba kordor jong u Blei. Haba kumta! ka Ri kaba kumno ngin aiti pateng sha ki khun ki kti?