Nongstoiñ, Jylliew 20: Ha kine ki sngi ki nongrep biskot ki la kmen bha namar ka dang dei ka por ba ki dang shu sdang pynmih biskot ha kaba ka dor ka la kiew haduh laiphew tyngka shi kilo. Hynrei, wat la ka dor ïew dor hat ka kiew ruh, ka jingpynmih biskot ka dang duna bha namar ka jing rang rkhiang palat ka suiñ bneng ha kine ki bnai ba la dep bad u jyntang biskot um da san bha.
U bah Dlingshon Marweiñ uwei na ki nongrep biskot na shnong Nongkasen haba ïakren bad u nongthoh khubor, u la ong ba ha ki snem ba la dep naduh ka taïew ba nyngkong jong u bnai Jylliew, u la ju ïoh ban kheit ar sien ha ka shi taïew bad ha ka sien kheit ba nyngkong, lah ban pynmih kumba saw haduh san spah kilo.
Haba nujor ïa ka dor ka kham lah ha kiwei ki snem, namar ha ka por ba dang pynmih nyngkong dang lah ban die ha ka dor sawphew haduh sawphew san tyngka shi kilo. Hynrei mynta u snem ha ka sien kheit ba nyngkong lah ban pynmih tang kumba ar haduh laispah kilo namar ka jingsan u jyntang ka suki palat.
U bah Marweiñ u la ong ruh ba ha ki snem ba la dep ha ka taiew ba ar bad ba lai jong u bnai Jylliew, da ki phew tylli ki Mahindra Pickup ki ïeng laiñ arsien shitaïew ha Nongkasen, Laitkseh, Marngor bad Markasa, ban thep biskot na ka bynta ban shalan sha kylleng ki jaka. Hynrei mynta u snem pat man ka sngi ba pynmih biskot ha surok tang kumba saw haduh san tylli ki Mahindra ki ïeng ban thep.
U la ong ruh ba imat mynta u snem wat tang haduh ka taïew ban wan ruh, ka dor biskot ka lah ban hiar sha ka arphew tyngka shi kilo. Namar kumba ka long baroh shi katta katba nang bun kiba pynmih biskot ka dor ka nang hiar man ka sngi bad haduh ban da poi u bnai Nailar lei lei ka dor ka hiar wat haduh ar tyngka shi kilo.
Nalor kata u la ong ba kaba lyngngoh ka long ban u biskot u la dei lypa u mar rep, hynrei ka sorkar kam khlem shimkhia satia ban bthah ïa ki nongkhaïi ba kin pynneh ïa ka dor bad lada ka long kum ha ki snem ba la dep ba ka dor ka hiar man la ka sngi ka jingtrei shitom ki nongrep ka shu sep ei.
