Nongstoiñ, Naitung 18: Ki paitbah nongrep sying ha kine ki sngi ki la sdang kmen bad phuhmat bha namar ba ka dor ïew dor hat jong utei u mar rep u la sdang ban kiew.
U bah Swingly Samakha uwei na ki nongrep sying ka thaiñ Langpih, haba ïakren bad u nongthoh khubor u la ong ba naduh u bnai Nohprah jong u snem ba la dep, ki paitbah nongrep sying ki la khuslai jingmut bha, namar ki nongkhaïi kiba wan na Assam ki thied tang ha ka dor shi hajar san spah haduh ar hajar tyngka shimon. Hynrei naduh u bnai Jylliew ba la dep ka dor jong utei u mar rep ka la sdang ban kiew suki suki bad imat ka dor ka lah ban ban kiew shuh shuh.
U la ong ruh ba u sying, u synsar, kwai tympew bad ki jait soh ba bun jait ki dei ki mar rep ba kognsan eh jong ki paitbah nongshong shnong katei ka thaiñ. Na kitei ki mar rep ka ïew synsar ka dei kaba shet kylla palat ïa ki nongrep, namar ha ka shi taïew ka dor ka lah ban kylla lai haduh saw sien.
Don teng teng ba ka ïew synsar ha ka por mynstep ka long da kumwei bad ynda janmiet pat ka la kylla da kumwei. Hynrei ka dor sying pat shisien ba ka la sdang ban kiew ka kiew suki jai bad ka neh hynrei don pat ki snem ba lada ym don ïew wat tang u nongthied ruh ym don. Nalor kata u la ong ba na ki jait mar rep baroh ba ki paitbah ka thaiñ ki rep u kwai u dei u mar rep u ba biang palat namar ka dor ka kiew man la u snem.
U bah Samakha u la ong ruh ba wat la ki paitbah ki la sdang ban ïabeh ban rep kwai, hynrei na ka jingsdang jong ka khlam kwai, ki nongrep kwai ki la sdang ban artatien namar lada ki rep ruh lada jia ba ka wan ka khlam kan wan rah ïa ka jingduh kaba khraw.
U la ong ruh ba naduh ki snem ba la dep ka khlam dieng kwai ka la sdang na ki thaiñ Upperlangsah, Noonmati, Domjaraiñ, ki shnong ha ka thaiñ Tynghor bad ka la pur ter ter sha ki thaiñ Sohmarang, Nongsohram ki shnong kiba don shaphang shatei na Langpih bad ka la pynartatien shibun ïa ki nongshong shnong ba kin rep kwai.
U bah Samakha u la ong ruh ba ka tei ka thaiñ ka dei ruh kaba duna bha ki jaka rep kba, wat la ka dei ka thaiñ kaba sei soh bha ruh. Katba nang mih ki sngi ka jingbun briew ka nang kiew, ki shnong ki la nang ïar hynrei ki jaka pat ki neh kumjuh. B
Ha kine ki sngi ki Nepali kiba wan buhai shnong ha ki thaiñ Umsohram, Makoibari, Lawbah haduh Umwahshar, ki la pynkhlaiñ bha ka rep synsar haduh ba ki jaka ki la dap lut tang da ki jaka rep jong ki Nepali.
U la ong ruh ba ïa ki Nepali ym lah satia ban leh ei ei, namar ba haduh mynta ka sorkar kam pat lah ban pyndep ïa ka jingpynbeit ïa u pud u sam bad ki Nepali ki ïeng halor ka nongrim ba katei ka thaiñ ka dei kaba hap hapoh Assam.
Nalor kata u la ong ruh ba jin lada ka sorkar Meghalaya bad Assam kin pynkloi noh ban pynbeit ïa u pud u sam u ba thikna, lada thaw da kino kino ki lad ruh kan ym don jingeh ïa ki Khasi. Hynrei ïa mynta ba ym pat pynbeit ïa u pud u sam lada leh jubor ruh kan pynthut ïa ka shong suk shong saiñ, kumta ym banse ban shu ïa im lang kumba ka long ha kine ki sngi.
U la ong ruh ba ki don bun bah ki briew kiba na kiwei pat ki thaiñ bad ki jaka kiba ong ba kan eh aïu ban beh krad ïa ki Nepali na katei ka thaiñ, haba ki dei ki mynder kiba shu wan shong thap bad buhai shnong beaiñ.
Katei ka jingong jong ki ka long kaba dei namar ba ki shu ong tang ka ktien, hynrei lada kin dei ma ki kiba shnong shnong tang hapoh Langpih ruh ki la sngewthuh haduh katno ka jingeh ka don.
