Nongpoh, Lber 03: Ka Synjuk ki Rangbah Shnong ha ka sngi Saitjaiñ ka la pynlong da ka jingïakynduh lang jong ki nongïalam bad ki dkhot na ka bynta ban pynkhreh halor ka jingwan hiar u CEM ka KHADC ban ïa kynduh kyrpang ïa ki nongïalam shnong ka Ri Bhoi, na ka bynta ban ïa kren bad ban ïa tai halor shibun ki kam jong ka imlang ka sahlang kaba dei ha ka jingpeit jingkhmih ka District Council.
Haba ïa kren bad ki lad pathai khubor, u Secretary ka Synjuk ki rangbah shnong, u Bah P.B Sylliang, u la ong ba ka synjuk ka pynpaw ïa ka mynsiem jong ka jingsngewkmen ba u CEM ka KHADC, u Bah Pynïaid Sing Syiem u la dep ban pynthikna ba ha ka 12 tarik mynta u bnai un sa hiar sha Ri Bhoi na ka bynta ban ïa kynduh kyrpang ïa ki nongïalam ka synjuk bad ki nongïalam shnong na ki shnong bapher bapher ka Ri Bhoi. U la ong ruh ym tang katta u CEM ha katei ka sngi un ïa kynduh kyrpang ruh ïa ki nongïalam ki Seng Longkmie bad ki Seng Samla na ka bynta ban ïa mir jingmut halor ka kam synshar khadar bad khamtam kaba ïa dei bad ka Direct Funding na ka sorkar kmie.
U la ong ruh kum ka synjuk ka kloi ban ïa trei lang ba u CEM uba la kloi ban pynlait por ban wan kynduh ïa ki nongïalam sha Ri Bhoi, namar kane ka jingwan jong u ban ïa kynduh ïa ki nongïalam shnong kum ki nongïalam shnong kin ioh lad ban pynpaw ïa shibun ki mat ki jura ba donkam ban ïa thir na ka bynta ka synshar ka khadar bad ruh kiwei kiwei ki kam kiba ai jingmyntoi ïa ki paradoh ki parsnam ha ka jingjingpeit jingkhmih ka KHADC.
Kum u Secretary ka synjuk, u labuh ruh ka jingkyrpad sha baroh ki nongïalam shnong na ki shnong bapher bapher ba kin ïa wan ban don lang ha katei ka sngi ka 12 tarik u Lber 2024 ha District Library Hall Nongpoh bad ka jingwan ïasnoh kti lang ki nongïalam shnong kan pynlong ka jingjop ïa kane ka jingwan hiar krypang u CEM ban ïa kynduh ïa ki nongïalam Shnong ka Ri Bhoi, u la bynrap.
