Shillong, K’Lyngkot 02 : Ka kynhun ïalehkai kriket U-19 jong ka Meghalaya ka la sngewkmen ba ki la ïoh ban wan ha ka kyrdan kaba ar jong ka Cooch Behar Trophy ha kane ka samoi 2023-24 ha ka plate group, hadien ba ka Nagaland kaba dei ka trai jaka ka la ïoh ban long ka nongjop.
Katei ka lympung kaba neh sawsngi ka la kut noh ha ka jingïakhaid hynin ka sngi ha Sovima hynrei ka Nagaland ka la ïoh ia ka nam jop hadien ba ki la ïoh ban lamkhmat ha ka inning kaba nyngkong.
Ka kynhun hadien ba ka la jop ïa ka jingkynting pisa ha ka 29tarik Nohprah, ka Nagaland ka la jied ban tied nyngkong bad kamai haduh 275 ron bad liem lut ki rangtied ha ka inning kaba nyngkong katba ka Meghalaya pat ka la ïoh ban kamai tang 234 ron la 10 wiket.
Kine ki ar inning ki la shim por haduh palat arsngi pura ban dep bad ka Nagaland ka la hap ban ïakhun tyngeh ban lait na ka shah rem khnang ba kan ïoh ban rah ïa ka nam jop bad kumta ka la ïakhun tyngeh ha ka kylla kaba bud ha ka snem thymmai ban ïoh kamai lang haduh 334 ron la 5 wiket.
Haba phai pat sha ki rangkawang bol ka Meghalaya ym lah ban len ba ki la lah ban l eh bha khamtam u Shavian Blah bad u Angkit Tamang kiba la ïoh ban khur mar 26 bad 25 wiket ha ki 7 tylli ki jingïakhun. Bad don ruh kiba la ïalehkai bha wat ha ka por tied kum u Pushkar Raj Singh uba la ïoh ban kamai dap spah ron ha ka semi final.
Ban ïoh rung sha ka final, ka Meghalaya ka donkam ban ïoh kamai bun bha khamtam hadien ba ka la shem jingeh ha ka sdang jong ka round robin.
Nyngkong ka la sdang da ka jingïakhaid bad ka Mizoram nangta shah rem ha ka Nagaland kiba baroh ar tylli ki jingïakhun ki dei ha la iing. Nangta wan sa ka jingïakhun ba nyngkong sa ïa ka Sikkim ha kaba ki la jop da ar wiket. Dei naduh katei ka jingïakhun ba kum ka kynhun ka la jam shakhmat bad jop ha kiwei pat ki jingïakhun jong ka round robin ha shwa ba kin pynliem ïa ka Arunachal Pradesh sha ka semi final.
“Nga sngewkmen haduh katta katta ba ki samla shynrang U-19 jongngi ki la lah ban khie khlieh hadien ki ar tylli ki jingïakhun ba shakhmat bad ïoh ruh ban wan mynta shakhmat,” ong u President ka MCA, u Naba Bhattacharjee hadien ka final.
Ha kajuh ka por u ai mynsiem ruh ïa ka kynhun U-16 jnog ka Jylla kaban aireng ha kane ka sngi kaba bud ha final jong ka plate group jong ka Vijay Merchant ha kaba ka kynhun kan hap ban aireng pyrshah ïa ka Manipur.
