Shillong, Risaw 02 : U MLA barim ka Mawlai Constituency u bah P. T Sawkmie uba dei ruh u nongïalam ka United Democratic Party (UDP) ula ong ba u long uba la kloi ban ïakhun iaka elekshon MP Lok Sabha 2024 lada ka Party ka ibit ban ai tiket bad pynïakhun ïa u kum u kyrtong jongka.
Lah ban kdew ba nalor ka kyrteng u bah P. T Sawkmie, ki kyrteng kiba la mih ki kynthup ïa u Myntri Sorkar bah Paul Lyngdoh, CEM barim ka KHADC bah Titosstarwell Chyne bad u bah Jemino Mawthoh bad kine ki kyrteng ki la saphriang ha ki lad pathai khubor ba ki kwah ban ïakhun ïa ka MP Lok Sabha Ilekshon 2024 na Shillong Parliamentary Seat.
Haba kylli halor kane ka khubor u bah P. T Sawkmie ula ong ba haduh mynta ka Party kam pat shim rai haba ïadei bad ki kyrtong ïakhun iaka MP Lok Sabha 2024 na Shillong Parliamentary Seat hynrei kum uwei nongmihkhmat ba la ih bha haka saiñ hima, u long uba la kloi ban ïakhun lada ka UDP ka ibit ban pynïakhun ïa u.
U bah P. T Sawkmie ula ïathuh ba ula don palat 30 snem ha ka kam saiñ pyrthei ban shakri ïa ki paidbah bad lada u shah jied ban long MP kan nang plie lad shuh shuh ban nang shakri ïa ka ri lum Khasi bad Jaiñtia baroh kawei.
“Lada ka UDP ka ibit ïa nga, nga long uba la pynkhreh ban ïakhun ïa ka election MP Lok Sabha 2024 na Shillong Parliamentary Seat hynrei ïa kane ka rai yn shim hadien ka jingïalang jong ka Party ban ïakren halor kane ka phang” la ong u bah P. T Sawkmie.
