Shillong, Nailar, 13 : Ka United Democratic Party (UDP) ha ka sngi Saitjaiñ ka la pynpaw ba ka long kaba kloi ban ïatreilang bad kino kino ki seng riewlum kiba don ïa kajuh ka jingthmu hapoh ka shatri jong ka Regional Democratic Alliance (RDA).
Ha ka jingïakren bad ki lad pathai khubor, u President jong ka party u Bah Metbah Lyngdoh bad u General Secretary u Dr Jemino Mawthoh ki la pynpaw ba kumba ki ïatreilang bad ka Hill State Peoples Democratic Party (HSPDP) hapoh ka shatri jong ka Regional Democratic Alliance (RDA) ka jingkhang ka plie ruh ïa ka Voice of the People Party (VPP) ba kan wan pynïasnoh sha kane ka kynhun.
Ka VPP ka dei ka seng saiñpyrthei kaba dang shu pynkha ha u snem 2022 shwa ba ka Jylla kan leit sha ka elekshon jong ka Ingdorbar Thawaiñ kaba la long ha u Rymphang mynta u snem.
Ka VPP ka la jop 4 tylli ki Seat ha kane ka elekshon.
