Kloi ka Sorkar ban ïakren ha kaba ïadei bad ka Land Bank: Conrad

Shillong, K’ Lyngkot 23: U Myntri Rangbah ka jylla u Conrad K Sangma u la ong ba ka sorkar jong u ka long kaba la khreh ban khot da ka jingïakren ha kaba ïadei bad ka rai ban thied jaka ne ban thaw ïa ki land bank na ka bynta ban kyntiew ïa ki kam pynlut ne investment ha Meghalaya.
Haba kynthoh ïa ka jingdawa jong ki sengbhalang ban pyndam noh ïa ka jingmut jong ki land bank, u Sangma u la ong ba ka sorkar ka long kaba la kloi ban ïakren bad kane ka kam wat la ym pat lah ban buh ïa ka tarik hynrei ka sorkar ka long kaba kloi ban khot ïa ki.
“Kane ka sorkar kam kwah ban ong em bad haba ngi la rai ngin ïaid shakhmat bad ngi kloi ruh ban kren bad kino kino kiiba kwah ban ïakren bad kino kino kiba don ka jingsngewkhia ki dei ban wan shakhmat ban ïakren bad ngi long kiba kloi ban batai ha kaba ïadei bad kane kam,” u la bynrap.
Haba kren shaphang ka jingdonkam ha ki ar bynta ha kaba ïadei bad kane ka mat u Sangma u la ong, “Ïa kine ki land bank lah dep thaw ruh ha ki por kiba mynshwa bad kane kam dei satia ka kam kaba thymmai kaba ngi la leh, ki sorkar kiba rim ruh ki la leh ïa kane bad kane ka sorkar ka shu bud ïa kaei kaba la leh da ka sorkar kaba rim. Kaba ar pat ka dei na ka bynta ban kyntiew ïa ka ïoh ka kot bad ka jingsengkam bad kumta kine ki land bank ki long kiba kongsan bad khlem ma ki ngin ym lah ban ïohi ïa ka jingkiew jong ka ïoh ka kot kaba ngi donkam. ”
Haba banjur ba kine ki land bank ki long kiba kongsan u Myntri Rangbah u la ong, “Khlem kine ki land bank ngin ym lah ban kiew. Namar kata ka sorkar ka donkam ban thied ïa ka jaka. Hadien ba la ïoh ïa ka khyndew ne ka jaka ka sorkar ka lah ban ai wai na ka bynta ka jingmyntoi jong ka jylla.”
“Mynta ka dei ka jingkylli kumno ban kyntiew ïa ka ïoh ka kot na ka bynta ka jylla. Kum ka sorkar la da phi jied ban pynmih ïa ki kam, lada phi kwah ban kyntiew ïa ka ïoh ka kot kine kin ym lah ban long khlem ka jingwan bei pisa jong ki karkhana shimet, namar kata ngi donkam ïa ki land bank, ngi donkam ban pynsuk ïa kiba wan bei tyngka hapoh ka jylla jong ngi,” ong u Myntri Rangbah.
U la bynrtap ruh da kaba ong, “Ka long kaba kongssan na ka bynta ban kyntiew ïa ka ïoh ka kot jong ka jylla watla ka don ka jingsngewkhia ha kaba ïadei bad ka land transfer act ha kaba ïadei bad ka investment promotion policy.”