Ka jingwan jong ki kor ki bor ba thymmai ha kane ka juk mynta ha kawei ka liang ka wanrah ka jingmyntoi lada pyndonkam hok bad ka ai kamai ruh ïa kito kiba la tbit ha kato ka laiñ. Hynrei don pat ki briew kiba la tbit palat ha kato ka bynta kiba pyndonkam da ki lad ki lynti ki bym dei ban thok ban shukor ban pynbiej ïa ki paidbah kiba shisur shi dur ban ngop ha ki jingpah jingphon bad ki shangkhawiah kiba bun jait bun rukom ba ki pyndonkam.
Ha kane ka juk ba bun ki briew ki la pyndonkam da ki kor internet wat ha kaba ïadei bad ki kam pisa pilain la ka long naduh ha ka jingphah pisa lyngba ka mobile khlem da donkam shuh ban leit sha bank, nangta ka jingsiew ia ki bill ba bunjait da kaba leh online ka la pynsuk ha kawei ka liang hynrei dang don pat ki briew kiba peit kliaw ha kano ka rukom phi pyndonkam khnang ba kin lah pat ban buddien ïa ka thied ka pet jong phi lane ka rukom pyndonkam jong phi ïa ki atm card lane wat haba ïadei bad ki mobile number ba phi ju pyndonkam ha kaba leh gpay bad kiwei kiwei.
Ka jingshlur jong ki briew mynta ha kane ka juk ban kamai spah bym hok ka la nang shyrkhei bha namarba ki pyndonkam da ki buit sianti kumno ban ïoh pynap shrip ïa ki riewpaidbah kiba lui lui ki bym da tip bha kumno ban pyndonkam ïa ka mobile phone bad ki bym da tip bha shaphang ka jingpyndonkam ïa ka Internet.
La ju ïohi ruh ba na ka por sha ka por ki pulit ka jylla ki ju maham bad pynbna ïa ki paidbah ba kim dei satia ban shu ngop ïa ka jingpynbiej nangne nangtai na ki briew kiba shu kam bahaiing bahasem lane ban shu kohnguh ban leit siew online khlem da pyntikna shwa ïa ka tynrai. Lehse la bun ki nongshong shnong kiba ju ïoh ïa ki phone call na ki briew ki bym ithuh kiba kam be-aiñ ïalade kum ki nongtrei jong ki Bank bapher bapher da kaba shukor ïa ki riewluilui da ki buit sianti tang ban ïoh lute ïa ka umsyep jong kiwei.
Don ruh ki briew kiba ngat ha ki suri kup snieh langbrot lyngba ka jingithuh ha ka social media, kata, ha ka Facebook, Instagram bad kiwei kiwei. Na ka jingïakren pariah manla ka sngi ki riewluilui ki ngop ha ka shrip da kaba duh ei ïa ka pisa da ki lak tyngka namarba ki riewbymman ki kular ban phah Parcel da kaba shu pynibang bad pynbiej da kaba phah ïa ki dur thok.
Sa kawei pat kaba kham triem shuh shuh ka long ba ki don ruh ki rukom dawa pisa da ki riewbymman da kaba pyntieng ïa ki riewluilui ba ki lah ban ngat ha ki bor ka ain lada kim siew pisa. La ju pynbna na ka por sha ka por ruh ba ki don ki riew beain kiba pyrshang jubor ban pynngeit ïa ki lanot, ki riewsniew ki pyntieng shuh shuh da kaba pynïasoh ïalade bad ki Pulit lane ki bor ka ain nalor ba ki byrngem kylla ban kem lada ki lanot kim treh ban ai ka jingïatreilang.
Kum kine ki jingshah shukor kin nang ïai jia lada ki briew kiba im ka jingim shisur shidur kim husiar bha namarba ki riewsniew, kumba la ju jia ki briew mynta kim salia ban phong ïa ka dur bula da kaba kam ïalade kum kita ki nongïalam ba lui lui bad ban pynbiej ïa ki briew ba kin ai ki jingnoh synniang. Ha kane ka juk kaba kaba baroh baroh ki briew ki sngewtynnat bha ban pyndonkam ïa ka Facebook, Instagram, ki don ki riewniam kiba la shah shim kabu ha kaba ki riewsniew kiba shna ïa ki Fake Account jong ki riewniam ban pan pisa ha ka kyrteng jong ki. Kine ki jingjia, kin nang jia. Ki paidbah ki dei hi ban husiar na kum kine ki jingjia kiba lah ban lam sha ki jingjia basngewsih bad ki dei ruh ban ujor dalade sha ki bor Pulit khnang ban lah ban buddien bad khanglad ia kiwei pat kiba lui lui ba kin lait na ki tyrsim jong kine ki briew.
Namarkata ki riewpaidbah ki dei ban long kiba husiar haba ki shim ïa ka phone call na ki briew ba kim ithuh bad kim dei satia ban ai ïa kino kino ki jingtip shimet ne kiba ïadei bad ka Bank jong ki namarba ha ka jinglong shisur ka bym pat ju jia mynno mynno ruh ki lah ban ngat ha ki jingshah pynap shrip ha ki riewbymman.
