Kitbok kitrwiang ka DS Wapungskur ïa u Dr. Heipor Uni Bang shwa ban leit shim ïaka National Teachers’ Award 2025 sha Delhi

Khliehriat, Nailur 01 : 01 : Ka Dorbar Shnong Wapungskur ha ka jingialang ba kyrpang ba la pynlong ha iïng Dorbar Shnong Wapungskur, ka la ai ka jingkhublei kitbok kitrwiang ïa u babu Dr. Heipor Uni Bang u ban sa mih na shnong ban leit shim ïa ka khusnam sha nongbah Delhi, ka National Teachers’ Award 2025 ha ka 5 tarik mynta u bnai nailur 2025.
Haba kren ha ka jingïalang ha Wapungskur, u Dr. Heipor Uni Bang u la pynpaw ka jingsngew kmen bad ong “nga sngewkmen bad nga sngew ioh mynsiem shi kat dei eh ïa kane ka sienjam ba ka Dorbar Shnong ka la shim ha shuwa ba ngan leit shim ne pdiang ïa ka Khusnam na ka President ka Ri , ka Droupadi Murmu ka ban long ha ka 5 tarik September, 2025 ha nongbah Delhi, kaba dei ruh ka sngi burom ki nonghikai, ngam don kyntien shuh ban pynpaw ïa ka jingkmen jongnga namar ka shnong ka dei ka mynsiem jongnga bad ngam sngew khun swet shuh ynda nga leit sha Delhi ruh namar ha shuwa ban ngan mih ka shnong ka la don ryngkat lang bad nga”.
Na ka liang u Secretary Shnong Wapungskur, u bah Aristotle C. Rymbai u la pynpaw ka jingkmen kaba khraw bad iaroh shi katdei ïa u Dr. Heipor Uni Bang uba la wanrah ïa ka nam ka burom ïa ka shnong ka thaw namar lyngba jong u ka shnong Wapungskur kan paw ha baroh kawei ka Ri India bad ka ri kan tip ba ka shnong Wapungskur ka la sei ïa ki nonghikai kiba kynsai, kiba stad bad ymdei ruh tang ïa ka Shnong Wapungskur hynrei ïa ka District East Jaiñtia Hills bad ïa ka Jylla hi baroh kawei..
Kumjuh ruh u Waheh Shnong ka Wapungskur, u bah Posling Dkhar ha ba ai jingkren u la pynpaw ka jingkmen kaba khraw bad ai ka jingiaroh ïa u Dr. Heipor Uni Bang u rangbah na ka shnong uba la la nohsyniang shi katdei eh sha ka imlang sahlang ha ka liang ka pule ka puthi hapoh shnong khamtam ha kaba ïadei bad ka jingai ïa ka jingnang jingstad ïa ki khun jong ka shnong bad ki para shnong ba marjan bad ong ruh ba lyngba une u rangbah ki khun ka shnong khamtam eh kito kiba don jingduna ha ki dkhot met ki la ioh ka lad ban pyndep ïa ka jingpule jong ki ha ka sul ba u la seng ka K.B Memorial Secondary School Wapungskur.
“Kane ka skul K.B Memorial Secondary School ka wanrah nam ruh man la u snem ïa ka Shnong jongngi da ka jing pass bha ki khynnah ha ka SSLC Examination, nga ai ka jingkitbok kitrwiang ïa u Dr Heipor Uni Bang ba un nang lah shuh ban ai ka jingshakri kaba bha tam ha ka imlang sahlang bad khamtam ha ka pule puthi”ong u Waheh Shnong.