Shillong, Risaw 05 : Hynne ka Sngi Palei ka United Democratic Party (UDP) Mawlai Circle ka ai khublei bad kitbok kit rwiang ïa ka kynhun ki thei lehkai kriket ki ban mihkhmat ïa ka jylla sha ka lympung ïakhun kaba la tip da ka BCCI’s Women’s U-19 One Day Trophy kaban ïalehkai ha Surat, Gujarat naduh ka 8 tarik mynta u bnai Risaw, 2023.
Na ka liang jong u Bah P.T Sawkmie, adviser lem bad u Bah H. Kharkongor, president ka UDP Mawlai Circle, bah T. Kharkongor, secretary bad kiwei de ki nongkitkam ka seng ki la pynpaw ïa ka jingsngewkmen kaba khraw ba ki samla kynthei jong ka jylla kin ïoh ka lad ban ïa shimbynta ha ka lympung ïalehkai jong ka BCCI ka ban sa long hapoh ka jylla Gujarat.
Ha kajuh ka por u Bah Sawkmie u kyntu bad ai mynsiem ïa ki ba kin ïakhun tyngeh ban poi sha ka thong.”Tang ka jingtrei shitom ka la ban ïarap ïa phi mynta, phi mihkhmat iaka jylla, kan poi ka por phin mihkhmat sa ia ka ri India,” ong uba Sawkmie haba kren ai mynsiem ïa baroh ki thei ïalehkai ka MCA.
